Aqtóbede mektepke hidjap kiip keletin 33 oqýshy qalyp otyr. Bul týraly búgin Ortalyq kommýnikatsiialar qyzmetindegi baspasóz máslihatynda Aqtóbe oblysynyń ákimi Berdibek Saparbaev aitty, dep habarlaidy "Ult aqparat".
«Hidjap máselesinde zańǵa sáikes júieli jumys júrgizip jatyrmyz. Ol jumystardy ary qarai jalǵastyramyz. Oǵan qoǵamdyq uiymdardy da jumyldyrý qajet. Bizde hidjap kietin balalardyń sany 530 bolatyn. Qazir 33 bala qaldy. Olardyń ata-analarymen jumys istep, túsindirip jatyrmyz», - dedi oblys basshysy.
Onyń aitýynsha, talap barlyq balaǵa birdei bolýy kerek. Barlyq bala qazirgi zamannyń talabyna, múmkindigine sai bilim alýy, emin-erkin oinaýy, sportpen ainalysýy kerek.
«Bul ata-ana retindegi barlyǵymyzdyń mindetimiz, paryzymyz. Eger biz balalarymyzdyń aldyndaǵy paryzymyzdy, mindetimizdi oryndamasaq, erteń ol balalar óskennen keiin bizge renish bildiredi. Olar qatarlastarynan kem bolady. Kezinde olar kónbeitin bolsa, bul iske ózimniń de aralasatyndyǵymdy aitqanmyn. Biraq, qazir jumystyń nátijesi bar», - dedi Berdibek Saparbaev.
