Úkimet basshysynyń orynbasary Berdibek Saparbaevtyń aitýynsha, Qazaqstanda 182 myń adam onkologiialyq aýrýlarǵa shaldyqqan, dep habarlaidy QazAqparat.
«Bizdiń eldiń Prezidenti men Úkimettiń kúsh salýymen Qazaqstanda onkologiialyq aýrýlardy azaitý, dertti erterek anyqtaý baǵytynda keshenshi sharalar qolǵa alynǵan. Qazirgi tańda Qazaqstanda onkologiialyq aýrýlarǵa shaldyqqan adamdardyń sany - 182 myń. Onyń 36 myńy qaterli isikke shaldyqqan. Onkologiialyq aýrýlardan keletin ólim-jitim sanyn azaitý úshin barynsha tiisti sharalar qolǵa alynǵanyn aita ketkim keledi. Tek sońǵy jyly ólim-jitimniń 5 paiyzy osy aýrýlardan kelgen. Bul rette tiimdi sharalardyń biri – diagnostika ekenin bilesizder. Iaǵni, aýrýdyń aldyn ala anyqtaýdyń mańyzy óte zor. Sońǵy ýaqytta bizde aýrýdy aldyn ala anyqtaý deńgeii 28 paiyzǵa kóterildi», - dedi Berdibek Saparbaev.
Premer-Ministrdiń orynbasarynyń aitýyna qaraǵanda, Qazaqstanda onkologiialyq aýrýlardy azaitý, aldyn ala diagnostikalaý jumysymen arnaiy ǵylymi-zertteý institýty, Ulttyq onkologiia jáne transpontologiia ortalyǵy men aimaqtardaǵy 16 onkologiialyq dispanser jumys júrgizedi.
«Qazaqstanda skriningti zertteý turaqty túrde ótedi. Elimizde onkologiialyq aýrýlarmen kúrestiń 2018-2022 jyldarǵa arnalǵan keshendi jospary qolǵa alynǵan. Bul keshendi jospardyń negizgi maqsaty – aýrýdyń aldyn alý, diagnostika, bul saladaǵy kadrlardy daiarlaý jáne qaita daiarlaý. Bul jospardy oryndaý úshin el biýdjetinen 35 mlrd teńge, sonymen birge, onkologiialyq aýrýlardy dári-dármekpen qamtamasyz etýge 12 mlrd teńge qarastyrylǵan. Iaǵni, bul baǵytta jumsalǵan qarajat sońǵy jyldary 5 esege ulǵaidy», - dedi ol.
Eske sala ketsek, elordada keshe Onkologiiadaǵy Dúniejúzilik kóshbasshylar sammitiniń jumysy bastalǵan bolatyn. Forým jumysyna Halyqaralyq obyrǵa qarsy odaq (UICC) prezidenti, joǵary mártebeli hanshaiym Dina Maired, Qazaqstan Densaýlyq saqtaý ministri Eljan Birtanov qatysýda.
