Jambyl oblysynda turatyn barlyq ult men etnos ókilderi óńirdegi beibitshilik pen kelisimdi saqtaýy tiis. Bul týraly oblys ákimi Berdibek Saparbaev halyqpen esepti kezdesýinde aitty, dep habarlaidy "Ult aqparat" oblys ákimdiginiń resmi saityna silteme jasap.
«Biz kóp ultty memleket ekenimizdi eshqashan umytpaýymyz kerek. Qazaqstannyń 30 jyldaǵy jetken eń basty bailyǵy – birlik pen beibitshilik. Biz muny odan ári saqtap turýǵa mindettimiz. Oblysta 87 etnos ókili ómir súredi desek, olar árqashan yntymaq pen tatýlyqta tirshilik keship keldi. Qordai aýdanynda bolǵan jaǵdai biz úshin sabaq bolýy tiis», - dep atap ótti B.Saparbaev.
Aimaq basshysy oblystaǵy alǵashqy jumys kúninen bastap qoǵamdyq keńespen, ziialy qaýym ókilderimen, birqatar aýyl turǵynymen kezdesý ótkizip, azamattardy jeke qabyldaǵanyn, halyqty tolǵandyratyn ózekti máselelerden habardar bolǵanyn atap ótti.
«Keshe menen «Zań talaptary saqtala ma?» dep surady. Saqtalady! Biz quqyqtyq memlekette ómir súremiz, sondyqtan elimizdiń zańdaryn oryndaýǵa mindettimiz», - dep atap ótti oblys basshysy.
