Búgin Nur-Sultan qalasynyń ákimi Baqyt Sultanov jáne QR Eńbek jáne halyqty áleýmettik qorǵaý ministri Berdibek Saparbaev elordanyń az qamtylǵan jáne kópbalaly otbasylarymen kezdesti, dep habarlaidy "Ult aqparat".
«Buryn otbasynyń tabysyn eseptegen kezde olardyń balalary úshin alatyn járdemaqysy, sondai-aq «Altyn alqa», «Kúmis alqa» úshin jáne múgedek bala úshin alatyn járdemaqy, sol siiaqty stipendiia, odan keiin jergilikti ákimdikten beriletin aqshalai járdemaqylardyń barlyǵy esepteletin edi. Osy jyldyń 1 sáýirinen bastap ol esepteýlerdi alyp tastadyq. Iaǵni ataýly áleýmettik kómek jáne basqa da memlekettik qoldaý kórsetiletin kezde joǵaryda atalǵan járdemaqy túrleri esepke kirmeidi. Elbasy bizge aldymen kómekke muqtaj otbasylarǵa qoldaý kórsetý kerektigin basa aitty. Osy maqsatta qazirgi kúni jergilikti atqarýshy bilik ókilderimen birigip, árbir otbasynyń jeke áleýmettik kartasyn jasaýdamyz. Bul tapsyrmany osy jyldyń 1 shildesine deiin bitirýimiz kerek, dál qazir onyń 30% daiyn. Tolyq jasap bolǵanda otbasylarǵa áleýmettik qoldaý kórsetý boiynsha odan arǵy baǵytymyzdy aiqyndaityn bolamyz», - dedi B.Saparbaev.
Sondai-aq, ministr jańa biznes ideialardy iske asyrý úshin aýylda turatyn kópbalaly otbasylarǵa jáne jastarǵa memlekettik granttar beriletinin sóz etti.
«Osy jyly qolǵa alynyp jatyrǵan atalǵan sanatqa jatatyn otbasylardy qoldaýdyń taǵy bir túri ol óz kásibimdi ashamyn degen azamattarǵa granttar men mikrokreditter berý. Mysaly, biyl óz kásibimdi dóńgeletemin degen 10 myń adamǵa 500 myń teńge kóleminde qaitarymsyz grant beriledi, budan bólek shaǵyn jáne orta kásipkerlikpen ainalysamyn degen jandar úshin 500 myń teńgeden 6,5 mln teńgege deiin shaǵyn nesie berý qarastyrylýda. Taǵy bir aityp ketetin jait, kópbalaly analar men múgedek bala tárbielep otyrǵan analar úshin úiinde áleýmettik jumys oryndaryn ashý jáne suranysqa ie kásipterge qysqa merzimdi oqytý uiymdastyrylady. Bunyń sebebi bul analar bala kútimine bailanysty úiden shyǵa almaidy sondyqtan jaǵdaidy úilerine aparyp jasaýdamyz», - dedi ol.
Odan bólek, B. Saparbaev qazirgi tańda ministrlik otbasylarǵa áleýmettik qyzmetter men qoldaý sharalarynyń 11 bólikten turatyn biryńǵai paketi qurastyrǵanyn aityp berdi.
1. 1-4-synyp oqýshylaryn tegin ystyq tamaqpen qamtamasyz etý;
2. Balalar men analardyń qoǵamdyq kólikte jeńildikpen júrýin qamtamasyz etý;
3. Mektep formasymen, oqýlyqtarmen jáne oqý kerek-jaraqtarymen qamtamasyz etý;
4. Balabaqshadaǵy orynǵa basymdy quqyq berý;
5. Balalar lagerlerinde tegin demalý;
6. Kommýnaldyq qyzmetter boiynsha ótemaqy tólemderi, kómirmen jáne otynmen qamtamasyz etý;
7. Gaz analizatorlaryn, jaryq pen sý esepteýishterin tegin ornatý;
8. Kópbalaly otbasylar úshin úide arnaiy jumys oryndaryn qurý, granttar men shaǵyn nesieler berý;
9. Barlyq eńbek etýge qabiletti AÁK alýshylardy jumyspen qamtý sharalary (oqytý, jumysqa ornalastyrý, jastar praktikasy, granttar men);
10. Turǵyn úi qurylys jinaqtary júiesi arqyly turǵyn úi jaǵdaiyn jaqsartý;
11. Birjolǵy áleýmettik kómek kórsetý.
