Ataýly áleýmettik kómektiń tólenýi sailaýmen bailanysty emes. Bul týraly eńbek jáne halyqty áleýmettik qorǵaý ministri Berdibek Saparbaev aitty, dep habarlaidy Sputnik Qazaqstan tilshisi.
Halyqqa esep berý kezdesýinde elordalyq turǵyn eńbek ministrine ataýly áleýmettik kómekke qatysty suraq qoidy.
"Áleýmettik jelilerde ataýly áleýmettik kómek sailaýdan keiin toqtatylady dep jii jazyldy. Osy ras pa?", - dep surady áiel.
Saparbaev áleýmettik kómektiń elde ótken kezekten tys prezident sailaýyna esh qatysy joq ekenin qadap aitty.
"AÁK-tiń tólenýi sailaýmen múlde bailanysty emes. Bizde áiteýir bárin sailaýmen bailanystyrǵandy jaqsy kóredi", - dep jaýap berdi ministr.
Ol biyl ataýly áleýmettik kómekke 130 milliard teńge qarastyrylǵanyn atap ótti. Birinshi jartyjyldyqtyń qorytyndysy boiynsha onyń 67 milliard teńgesi jumsalǵan.
Buǵan qosa, ministr turmysy tómen otbasylarǵa kómek kórsetý baǵdarlamalary qaita qaralyp jatqanyn aitty. Bul úshin eki jumys toby qurylǵan.
"Bir jumys toby kópbalaly jáne turmysy tómen áielder men erlerden quralǵan. Biz olardyń usynystaryn eskerip, tiisti ministrliktermen kelisip, jol kartasyn ázirledik. Jýyrda ony prezident ákimshiliginiń basshysy qaraidy, keiin úkimetke berip, tiisti sheshim qabyldanady", - dedi Saparbaev.
