QR Premer-Ministriniń orynbasary Berdibek Saparbaev jańa mehanizm boiynsha ataýly áleýmettik kómek 367 myń otbasyna berilip jatqanyn málim etti, dep habarlaidy QazAqparat tilshisi.
«Áleýmettik saladaǵy jumystardyń basty maqsaty – qazaqstandyqtardyń jaǵdaiyn jaqsartý. Ózderińiz biletindei, biyldan bastap biýdjettik mekemede eńbek etetin muǵalimderdiń, dárigerlerdiń, mádeniet, óner jáne sport salasynda qyzmet etetin qyzmetkerlerdiń jalaqysy orta eseppen 25-30 paiyzǵa kóbeiedi. Oǵan qosymsha barlyq áleýmettik tólem 5 paiyzdan 30 paiyzǵa deiin artady. Qoryta aitqan kezde osy sharamen 7 millionnan astam qazaqstandyq qamtylady. Osy sharalardy júzege asyrý úshin biýdjetten 3,7 mlrd teńge qarjy bólingen. Jalpy, biylǵy memleketimizdiń biýdjetiniń 50 paiyzy áleýmettik salaǵa arnalǵan. Byltyrǵy jylmen salystyrǵanda 12,5 paiyzǵa ósken. Iaǵni, onyń qazirgi kólemi – 8,5 trillion teńge», - dedi Berdibek Saparbaev OKQ-da ótken baspasóz máslihatynda.
Berdibek Saparbaevtyń óz sózinde ataýly áleýmettik kómektiń jańa mehanizmi iske qosylǵanyn eske saldy.
«Qazirgi tańda biz 367 myń otbasyna 17 mlrd teńge tóledik. Oǵan qosymsha jergilikti bilik tarapynan da kómekter kórsetiledi. Byltyrdyń ózinde 2 millionǵa jýyq jerlesimizge ártúrli deńgeide kómek kórsetildi. Sondai-aq, byltyr kópbalaly jáne az qamtylǵan otbasylarǵa 8400 páter berildi. Onyń ishinde 1100 páter kásipkerlerdiń kómegi», - dedi ol.
