Ulttyq qoǵamdyq senim keńesiniń múshesi, qoǵam qairatkeri Raýan Kenjehanuly Qazaqstan mektepterin bir aýysymda oqý rejimine kóshirýdi usyndy, dep habarlaidy QazAqparat.
«Qazaqstanda bilim berý sapasyn arttyrýǵa basty kedergi – mektep jaǵdaiy dep oilaimyz. Naqtyraq aitsaq, Qazaqstanǵa mektep jetispeidi. Qazirgi tańda elimizdegi 7400 mektepte jalpy sany 3,5 mln asa bala bar. Onyń 70% - eki aýysymda, al 200 myń bala úsh aýysymda oqidy», - dep atap ótti spiker Ulttyq qoǵamdyq senim keńesiniń onlain formattaǵy 3-otyrysynda.
Onyń aitýynsha, Qazaqstan sońǵy jyldary bilim berýdiń mazmunyn jańartýǵa kóp kúsh saldy. Ilgeri damyǵan elderdiń talaptaryna baǵyttaldy.
«Biraq, biz talaptaryna umtylyp otyrǵan elderdiń eshqaisysynda úsh nemese eki aýysymda oqytatyn mektep joq. Al sapaly bilim berý úshin mekteptiń bir aýysymda jumys isteýi mańyzdy. Bizdiń esebimizshe, orta bilim berý júiesin tolyqtai bir aýysymǵa ótkizý úshin Qazaqstanǵa shamamen 3 myńdai jańa mektep qajet. Árine, mundai asa aýqymdy máseleni memleket tek óz kúshimen tez arada sheshe almaidy. Bizdiń usynymyz - mektep salýǵa jeke qorlardy keńinen tartý», - dedi R. Kenjehanuly.
Spiker qazirgi memlekettik jekemenshik áriptestik quraly jáne bilim berýdi jan basyna qarjylandyrý tetigi mektep salýǵa jeke qarajatty, sonyń ishinde sheteldik qorlardy tartýǵa múmkindik beredi dep esepteidi.
«Alaida, osy atalǵan tetikter aiasyndaǵy biznesti ekonomikalyq turǵydan yntalandyrý sharalary jetkiliksiz. Olardy qaita qarap, keńeitý qajet dep sanaimyz. Sonymen birge, daǵdarystan keiingi ekonomikany jandandyrýdyń bir amaly retinde mektep qurylysyn da qarastyrýǵa bolar edi. Aýqymdy mektep qurylysynyń ekonomika men qoǵamǵa uzaq merzimde bereri mol ekenine senimdimiz. Tiisti esepterimiz ben naqty usynystarymyzdy Bilim jáne ǵylym ministrligine berdik», - dedi Raýan Kenjehanuly.
Aita keteiik, osy ýaqytta QR Prezidenti Qasym-Jomart Toqaevtyń tóraǵalyǵymen Ulttyq qoǵamdyq senim keńesiniń úshinshi otyrysy ótip jatyr. Kezekti otyrys adami kapitaldy damytýǵa, atap aitqanda, bilim berý, densaýlyq saqtaý máselelerine arnalǵan.
