Totydai túrlengen Taldyqorǵan qalasynda elimizde teńdesi joq olimpiadalyq jabyq júzý basseini salynýda. Bairaqty básekeler ótip, ult abyroiyn asqaqtatatyn sportshylarymyzdyń jeńisin ásem saraidan kórý úshin sapa men sáýlet sai bolý kerek. Osyǵan orai sannan góri sapany basty nazarda ustaityn Almaty oblysynyń ákimi Amandyq Batalov atalmysh nysandy aralap, jumys barysymen tanysty.
Álemdik dodalar ótkiziletin úsh qabatty sport nysanynda jumys qyza túsken. Jumysshylar da ózderine berilgen mindetti minsiz atqarýda. 475 adam tartylǵan qurylys jumysy qyrkúiek aiyna deiin aiaqtalýy tiis.
Mamandardyń aitýynsha, amfiteatr formasynda turǵyzylatyn nysan jumysynyń 80 paiyzy aiaqtalǵan. Endigi maqsat – qurylǵylardy ornatý. Oblys ákimi ámbebap bassein ǵimaratynyń ishin aralap, mamandarmen tildesip, jumys jaǵdaiyn surady. Sonymen qatar, aimaq basshysy mamandarmen ǵimarattyń ishi-syrtynyń dizainy qalai bolatynyn, qandai túske boialatynyn, tipti qandai material qoldaný kerektigin de aqyldasty. Qurylystaǵy kem-ketikterge basa nazar aýdaryp, túzetýdi talap etip, qurylys jumystaryn sapaly ári josparǵa sai aiaqtaýdy tapsyrdy.
– Jabyq júzý basseininde sý sportynyń barlyq túri bolady. Buiyrsa, óńirimizde Aziia, álem birinshiligin ótkizemiz. Sý sportymen ainalysqan bolashaq jastarymyzdyń jeńisin kóremiz. Ol úshin barlyǵy álemdik standartqa sai bolýy kerek. Eń aldymen, sý tazalyǵyn basty nazarda ustaýymyz qajet. Qurylystyń sapasy men sáýletine sai jáne ýaqytyly aiaqtalýy basty nazarda. Biraq ǵimarattyń aýlasyndaǵy jumystar áli kúnge deiin aiaqtalmaǵan. Iaǵni, jumys durys qadaǵalanbaǵan. Qalanyń kórki bolyp turatyn nysannyń ishi ǵana emes, syrty da jainap, jaiqalyp turýy qajet, – degen aimaq basshysy ǵimarattyń ainalasyn abattandyrý men kógaldandyrýǵa deiin kóńil bólý kerektigin aitty. Sonymen qatar, ǵimarattyń ainalasyndaǵy qurylys jumystaryn 20 shildege deiin aiaqtaýdy tapsyrdy. Sondai-aq, jurtshylyq ǵimarattyń syrtynan qarap-aq qyzyǵatyndai ásemdelip, ár eldiń Memlekettik Týlaryn ornatý kerektigin eskertti.
Jiyn sońynda Amandyq Ǵabbasuly orynbasary Lazzat Turlashovqa, Taldyqorǵan qalasy ákimi Ǵalymjan Ábdiraiymovqa, oblystyq dene shynyqtyrý jáne sport basqarmasynyń basshysy Nurbaqyt Teńizbaevqa qurylys jumysyn jii kelip qadaǵalaýdy tapsyrdy. Ár apta saiyn atqarylyp jatqan sharýalardy baiandap turý kerektigin jetkizdi. Mamandarǵa da arnaiy tapsyrma júktep, qurylys qarqynyn báseńdetpei, álemdik deńgeidegi jarystardy ótkizýge laiyqtalǵan keshendi sapaly ári ádemi etip salý qajet ekenin eske saldy.
Aidar QALIEV,
"Jetisý" gazeti
