«Qazaqstannyń 100 jańa esimi» jobasy jeńimpazdarynyń arasynda áigili Ilon Mask uiymdastyryp jatqan halyqaralyq konkýrstyń finalisi Sanjar Taijan da bar, dep habarlaidy QazAqparat.
Prezident Qasym-Jomart Toqaevpen kezdesýde sóz sóilegen talapty jaspen sharadan keiin shaǵyn suhbat qurýdyń sáti túsken bolatyn.
«Qazir jasym 23-te. Bala kúnimde kim bolatynymydy naqty bilmesem de, tehnologiiaǵa áýes bolyp óstim. Kún saiyn tańǵy shaidyń aldynda otbasylyq kóligimizge baryp amandasatynmyn. Tórt jasymda mashinalardyń barlyq markasyn jatqa biletin edim. Ata-anama bul kúlkili kórinetin. Al 6 jasymda ózim oilap tabatyn avtomobil brendine «TaiSan Motors» dep at qoiam dep sheshtim. Qazir sol armanymdy iske asyrýǵa jaqyn turmyn», - dep bastady ol áńgimesin.
Ulybritaniiada bilim alǵan jas injener 2017 jyly Bellerbys CollegeCembridge-diń «Jyl stýdenti» atanady. Sodan beri ǵylymǵa arqa súiegen jastyń aiy ońynan týyp keledi.
«Búginge deiin álemniń 20 elinen 400-den astam injenerin tarta otyryp, ozyq tehnologiialarmen bailanysty birneshe jobaǵa qatystym. Ondaǵy maqsatymyz – kólikterdi tiimdi ári qolaily ete túsý boldy. Jýyqta Ilon Maskpen kezdesemin. Ol bizdiń ideiamyzǵa qyzyǵýshylyq tanytyp otyr. Al ol maǵan qaitpaityn qaisarlyǵymen unaidy. Osyndai tájiribeniń arqasynda óz ideialarymyzdy sońyna deiin iske asyra alatynymyzǵa senimdimin. Memleketimizdiń bolashaǵy degen sol», - deidi Sanjar.
Sońǵy jyldary jahandyq aýqymda tehnologiialyq trendterdiń kóshin bastap kele jatqan Ilon Masktiń kózine túsý ońai emes ekeni belgili. Sanjar bul iske naqty josparmen kiriskenin aitady.
«2017 jyly men Ýorvik ýniversitetine túsip, Ilon Masktiń týrnirine qatysatyn eki komandany jasaqtadym. Birinshi komandam – Warwick Hyperloop. Bul komandamen SpaceX Hyperloop týrnirinde jartylai finalǵa ótip, 1600 komandanyń arasynan úzdik 35 ujymnyń ishine kirdik.
Ekinshi komandamnyń aty – Warwick Boring. Bul komandamen finalǵa ótip otyrmyz. Qazir búkil komandamyzben Amerikadaǵy konkýrstyń finalyna daiyndalyp jatyrmyz. Osy jazda Ilon Masktiń ózine burǵylaýshy mashinanyń prototipin tanystyramyz. Ol jerde álemdegi úzdik innovatorlardyń Top-3 paiyzy qatysady. Biz ózimiz jasaǵan innovatsiialyq tehnologiia álemge 3D ólshemmen qozǵalýǵa múmkindik beretinine senimdimiz. Qazir bárimiz 2D ólshemmen qozǵalyp júrmiz. Bul konkýrsqa basynda 400 komanda iriktep alynǵan bolatyn. Qazir finalda 12 komanda qaldyq», - dep túsindirdi jas injener.
Jobanyń bolashaǵyna Ýorvik ýniversitetiniń basshylyǵy da senimmen qaraǵan syńaily. Prototipti jasaýǵa jan-jaqty qoldaý kórsetken eken.
«Bul ǵylymi jobany negizinen ózim oqyǵan ýniversitet qarjylandyrdy. Ol jaǵynan ýniversitetimiz jaqsy qoldaý kórsetedi. Týrnir bitken soń Qazaqstanǵa qaityp kelip, kólikpen jáne tehnologiialarmen bailanysty jobalardy iske asyrýdy josparlap otyrmyn», - dedi Sanjar Taijan.
Onyń Qazaqstanda kólikpen bailanysty tehnologiialyq jobalardy qolǵa alam dep otyrýy beker emes. Birinshiden, bala kúninen beri «TaiSan Motors» dep at qoiǵan janyna eń jaqyn jobany óz elinde iske asyrǵysy keledi. Ekinshiden, buǵan deiin áigili Jaguar kompaniiasynyń bazasynda bul saladaǵy bilimin is júzinde synap, naqty tabysqa jetken bolatyn.
«Rasymen de men Jaguar Land Rover kompaniiasynyń litii batareiasynyń injeneri bolyp jumys istedim. Ol jerde elektromobilderge arnalǵan batareialardyń keleshek nusqalaryn daiyndadym. Nátijesinde meniń jumysym elktromobilderdiń júrý uzaqtyǵyn 8 paiyzǵa uzartty. Biyldan bastap Jaguar-dyń barlyq elektromobilderi men modeldegen batareialarmen júre bastaidy», - deidi «100 jańa esim» jeńimpazy.
Sóz sońynda ónertapqysh álemniń ár túkpirinde júrgen talantty qazaqstandyqtar elge oralsa degen armany bar ekenin jetkizdi
«Maǵan Qazaqstandaǵy moraldyq qoldaý qatty seziledi. Osy úshin óte rizamyn. Memleket jobalarymyzdy Qazaqstannyń ózinde iske asyrǵanymyzdy qalaidy. Sol múmkindikti paidalanyp qazaqstandyq elektrokar jasap shyǵarmaqshymyn. Ol kólik búkil qazaqstandyqtar úshin qoljetimdi jáne tiimdi bolatynyna shyn nietimmen senemin. Osy jobanyń Qazaqstanda sátti iske asqanyn kórip álemniń ár túkpirinde júrgen talantty qazaqstandyqtardyń otanǵa oralǵanyn shyn júregimmen qalaimyn. Memlekettiń jastardy qalai qoldap jatqanyn kórip júrmiz. Men jýyq arada elimizde álemdik aýqymdaǵy tyń jobalar sátti iske asqanyn kóretimizge senimdimin», - dedi ónertapqysh.
