Sanitarlyq talaptarǵa neǵurlym salǵyrt qaraýdyń sońy aýrýdyń soǵurlym ósýine ákep soǵatynyn adamdar túsinýi kerek. Bul týraly búgin Úkimet otyrysynda QR Premer-Ministri Álihan Smaiylov aitty, dep habarlaidy QazAqparat tilshisi.
«Elimizdiń búkil óńirinde koronavirýs infektsiiasymen naýqastanýdyń kúrt óskeni baiqalyp otyr. Jyl basynan beri indetti juqtyrý deńgeii 21 esege ósti. Túrkistan oblysy ǵana «sary aimaqta», al qalǵan óńirdiń barlyǵy «qyzyl aimaqta». Táýligine virýstyń eń kóp taralý jaǵdaiy - elordada, Almaty qalasynda, Qaraǵandy jáne Atyraý oblystarynda tirkelip otyr. Biz mundai jaǵdaidyń bolaryn boljadyq, eń bastysy, barlyq óńirde epidemiologiialyq ahýaldy qatań baqylaýda ustaý qajet», - dedi Úkimet basshysy.
Onyń atap ótýinshe, koronavirýstyń taralýyna jol bermeý jónindegi vedomstvoaralyq komissiia óńirlerde qosymsha shekteý is-sharalaryn qabyldady. Olar naqty oryndalýy tiis.
«Betperde kiiý, áleýmettik araqashyqtyqty saqtaý siiaqty negizgi aldyn alý sharalaryn buljytpai saqtaý kerek. Sanitarlyq talaptarǵa neǵurlym salǵyrt qaraýdyń sońy aýrýdyń soǵyrlym ósýine ákep soǵatynyn adamdar túsinýleri kerek. Sondyqtan monitoringtik toptardyń jumys qarqynyn barynsha kúsheitý qajet. Virýstyń taralýyn azaitý úshin naýqastardy der kezinde oqshaýlap, adamdardyń kóp jinalýyna jol berilmeýi tiis», - dedi Premer-Ministr.
Osyǵan orai ol Densaýlyq saqtaý ministrligi men ákimdikterge aýrýhanalarda qosymsha oryndar daiyndaýdy tapsyrdy.
«PTR-testileý deńgeii tómen óńirlerde olardyń sanyn ulǵaitý qajet. Ásirese, Almaty, Shyǵys Qazaqstan, Jambyl, Qostanai jáne Túrkistan oblystarynda testileý az jasalady. Elordada, Almaty, Shymkent qalalarynda, Atyraý, Túrkistan, Almaty, Qyzylorda jáne Mańǵystaý oblystarynda revaktsinalaý qarqyny jaqsarǵan joq. Demek, bul máselege ákimder durys qaramai otyr. Sondyqtan atalǵan óńirler bul jumysty tezdetý kerek», - dedi Álihan Smaiylov.
