Densaýlyq saqtaý ministrligine qarasty Taýarlar men kórsetiletin qyzmetterdiń sapasy men qaýipsizdigin baqylaý komiteti birinshi jartyjyldyqta atqarǵan jumysyn qorytyndylady, dep habarlaidy QazAqparat tilshisi.
«Ai saiyn búkil respýblika boiynsha Ulttyq saraptaý ortalyǵynyń 7 myńǵa jýyq mamany shamamen 7,2 mln zertteý jumysyn júrgizedi. Qyzmetkerlerimizdiń osy jumysynyń arqasynda halyqtyń densaýlyǵyna qater tóndiretin, talapqa sai kelmeitin ónimder dál mezgilinde anyqtalyp, infektsiialyq aýrýlardyń taralýyna jol berilmeidi. Osylaisha, ónim qaýipsizdigine ai saiyn ótkiziletin monitoring halyq tutynatyn 32 myńnan astam taǵam ónimderi men taýarlardy qamtydy. Onyń 19,6 paiyzy tehnikalyq reglamentterdiń talaptaryna sáikes bolmai shyqty. Osy faktiler boiynsha 1 myńnan asa uiǵarym jazylyp berildi. 38 mln teńgeniń aiyppuly salyndy. Ainalymnan 16 mln teńgeniń 29 tonna qaýipti ónimi tárkilendi», - dedi QR Densaýlyq saqtaý ministrligi Taýarlar men kórsetiletin qyzmetterdiń sapasy men qaýipsizdigin baqylaý komiteti tóraiymy Liýdmila Biýrabekova OKQ-da ótken baspasóz máslihatynda.
Liýdmila Biýrabekova sonymen qatar, epidemiologiialyq ahýal týraly da sóz qozǵady.
«Alǵashqy jartyjyldyqta asa qaýipti infektsiialardyń tirkelý jaǵdaiy kezdesken joq. Ótken jyldyń tiisti kezeńimen salystyrǵanda 32 infektsiia boiynsha aýrý jaǵdaiyn azaitýǵa qol jetkizildi. Atap aitqanda, A gepatitti virýs deńgeii 2,5 esege, epidemiialyq paratit 2,6 esege, meningogok infektsiiasy 49,4 paiyzǵa, salmonoloz 26,5 paiyzǵa tómendedi. Qyzylsha aýrýynyń jii tirkelýine bailanysty shara qabyldanyp jatyr. Qazirge deiin elimizde qyzylshaǵa shaldyǵý boiynsha 9 jaǵdai tirkeldi. Atalmysh aýrý vaktsinatsiiadan ótpegen balalarda kezdeskenin atap ótý kerek», - dedi komitet basshysy.
Komitet basshysy sanitarlyq-epidemiologiialyq salada erekshe tártippen 20 myńǵa tarta tekserý jumysy júrgizilgenin tilge tiek etti.
«Olardyń 16 600 boiynsha buzýshylyq anyqtalyp, 753 mln teńgeniń aiyppuly salyndy. Sol sekildi jospardan tys tekserý kezinde 2 485 nysanda 8 myńǵa tarta buzýshylyq anyqtalyp, oǵan jol bergender 150 mln teńgeniń aiyppulyn arqalady. Sanitarlyq-epidemiologiialyq saladaǵy negizgi buzýshylyqtar retinde ónimderdiń saqtalý merzimin qadaǵalamaýyn, meditsinalyq tekseristerdiń bolmaýyn, merzimi ótken ónimderdi satý, as blogyndaǵy tazalyqtyń azdyǵyn atap ótýge bolady», - dedi Liýdmila Biýrabekova.
