دەنساۋلىق ساقتاۋ مينيسترلٸگٸنە قاراستى تاۋارلار مەن كٶرسەتٸلەتٸن قىزمەتتەردٸڭ ساپاسى مەن قاۋٸپسٸزدٸگٸن باقىلاۋ كوميتەتٸ بٸرٸنشٸ جارتىجىلدىقتا اتقارعان جۇمىسىن قورىتىندىلادى, دەپ حابارلايدى قازاقپارات تٸلشٸسٸ.
«اي سايىن بٷكٸل رەسپۋبليكا بويىنشا ۇلتتىق ساراپتاۋ ورتالىعىنىڭ 7 مىڭعا جۋىق مامانى شامامەن 7,2 ملن زەرتتەۋ جۇمىسىن جٷرگٸزەدٸ. قىزمەتكەرلەرٸمٸزدٸڭ وسى جۇمىسىنىڭ ارقاسىندا حالىقتىڭ دەنساۋلىعىنا قاتەر تٶندٸرەتٸن, تالاپقا ساي كەلمەيتٸن ٶنٸمدەر دەل مەزگٸلٸندە انىقتالىپ, ينفەكتسييالىق اۋرۋلاردىڭ تارالۋىنا جول بەرٸلمەيدٸ. وسىلايشا, ٶنٸم قاۋٸپسٸزدٸگٸنە اي سايىن ٶتكٸزٸلەتٸن مونيتورينگ حالىق تۇتىناتىن 32 مىڭنان استام تاعام ٶنٸمدەرٸ مەن تاۋارلاردى قامتىدى. ونىڭ 19,6 پايىزى تەحنيكالىق رەگلامەنتتەردٸڭ تالاپتارىنا سەيكەس بولماي شىقتى. وسى فاكتٸلەر بويىنشا 1 مىڭنان اسا ۇيعارىم جازىلىپ بەرٸلدٸ. 38 ملن تەڭگەنٸڭ ايىپپۇلى سالىندى. اينالىمنان 16 ملن تەڭگەنٸڭ 29 توننا قاۋٸپتٸ ٶنٸمٸ تەركٸلەندٸ», - دەدٸ قر دەنساۋلىق ساقتاۋ مينيسترلٸگٸ تاۋارلار مەن كٶرسەتٸلەتٸن قىزمەتتەردٸڭ ساپاسى مەن قاۋٸپسٸزدٸگٸن باقىلاۋ كوميتەتٸ تٶرايىمى ليۋدميلا بيۋرابەكوۆا وكق-دا ٶتكەن باسپاسٶز مەسليحاتىندا.
ليۋدميلا بيۋرابەكوۆا سونىمەن قاتار, ەپيدەميولوگييالىق احۋال تۋرالى دا سٶز قوزعادى.
«العاشقى جارتىجىلدىقتا اسا قاۋٸپتٸ ينفەكتسييالاردىڭ تٸركەلۋ جاعدايى كەزدەسكەن جوق. ٶتكەن جىلدىڭ تيٸستٸ كەزەڭٸمەن سالىستىرعاندا 32 ينفەكتسييا بويىنشا اۋرۋ جاعدايىن ازايتۋعا قول جەتكٸزٸلدٸ. اتاپ ايتقاندا, ا گەپاتيتتٸ ۆيرۋس دەڭگەيٸ 2,5 ەسەگە, ەپيدەمييالىق پاراتيت 2,6 ەسەگە, مەنينگوگوك ينفەكتسيياسى 49,4 پايىزعا, سالمونولوز 26,5 پايىزعا تٶمەندەدٸ. قىزىلشا اۋرۋىنىڭ جيٸ تٸركەلۋٸنە بايلانىستى شارا قابىلدانىپ جاتىر. قازٸرگە دەيٸن ەلٸمٸزدە قىزىلشاعا شالدىعۋ بويىنشا 9 جاعداي تٸركەلدٸ. اتالمىش اۋرۋ ۆاكتسيناتسييادان ٶتپەگەن بالالاردا كەزدەسكەنٸن اتاپ ٶتۋ كەرەك», - دەدٸ كوميتەت باسشىسى.
كوميتەت باسشىسى سانيتارلىق-ەپيدەميولوگييالىق سالادا ەرەكشە تەرتٸپپەن 20 مىڭعا تارتا تەكسەرۋ جۇمىسى جٷرگٸزٸلگەنٸن تٸلگە تيەك ەتتٸ.
«ولاردىڭ 16 600 بويىنشا بۇزۋشىلىق انىقتالىپ, 753 ملن تەڭگەنٸڭ ايىپپۇلى سالىندى. سول سەكٸلدٸ جوسپاردان تىس تەكسەرۋ كەزٸندە 2 485 نىساندا 8 مىڭعا تارتا بۇزۋشىلىق انىقتالىپ, وعان جول بەرگەندەر 150 ملن تەڭگەنٸڭ ايىپپۇلىن ارقالادى. سانيتارلىق-ەپيدەميولوگييالىق سالاداعى نەگٸزگٸ بۇزۋشىلىقتار رەتٸندە ٶنٸمدەردٸڭ ساقتالۋ مەرزٸمٸن قاداعالاماۋىن, مەديتسينالىق تەكسەرٸستەردٸڭ بولماۋىن, مەرزٸمٸ ٶتكەن ٶنٸمدەردٸ ساتۋ, اس بلوگىنداعى تازالىقتىڭ ازدىعىن اتاپ ٶتۋگە بولادى», - دەدٸ ليۋدميلا بيۋرابەكوۆا.
