Almaty oblysynda bolǵan AN-28 ushaǵy apatyn tekserý maqsatynda arnaiy komissiia quryldy, dep habarlaidy QR Investitsiialar jáne damý ministrliginiń baspasóz qyzmeti.
«Búgin QR Investitsiialar jáne damý vitse-ministri Roman Skliar basshylyǵymen komissiia músheleri aviatsiialyq oqiǵa oryn alǵan jerge attandy. Oqiǵanyń anyq-qanyǵy jaqyn arada belgili bolady» delingen ministrlik habarlamasynda.
Sondai-aq, QR Investitsiialar jáne damý ministri Jeńis Qasymbek áýe apatynan qaza tapqan ekipaj músheleri - áýe kemesiniń komandiri Gennadii Tsoi, ekinshi pilot Evgenii Kýtafin, aviatehnik Beishibek Ahmatbaev, Akýsheriia, ginekologiia jáne perinatalogiia ǵylymi ortalyǵynyń professory, dáriger akýsher-ginekolog Patsaev Talǵat Anapiuly men Kardiologiia jáne ishki aýrýlar ǵylymi-zertteý institýtynyń reanimatolog dárigeri Artyqbaev Jánibek Túkenulynyń jaqyndary men týystaryna qaiǵyryp kóńil aitatyndyǵyn jetkizdi.
Eske salaiyq, 3 qazan kúni Almaty-Shymkent baǵytynda sanitarlyq aviareisin oryndaǵan «AN-28» ushaǵy saǵat 18:47-de Almatydan 28 shaqyrym qashyqtyqta rodardan joǵalyp ketti. Sosyn saǵat 19.15-te ushaq Almaty oblysy Ile aýdanynyń Mejdýrechinsk aýyly mańynda apatqa ushyrap, órtengeni habarlandy. Bortta bolǵan 5 adam qaza boldy.
