«Samuryq-Qazyna» ulttyq ál-aýqat qory» aktsionerlik qoǵamynyń basqarma tóraǵasy Almasadam Sátqaliev Úkimet otyrysynda Sarsha eldi mekeni Jyly jaǵajai aimaǵynda gaz tarifin ósirý máselesin kóterdi, dep habarlaidy QazAqparat.
«Mańǵystaý oblysyn damytýdyń keshendi josparynda bizdiń qor jaýapty 30 is-shara eskerilgen. Jalpy kompaniianyń investitsiia kólemi 692 mlrd teńgeden asady. Keshendi josparda aimaqtyń mańyzdy infraqurylym jobalaryn júzege asyrý kózdelgen. Atap aitqanda, «Astrahan-Mańǵyshlaq» magistraldy sý tartqyshyn qaita jańǵyrtý, Kendirli aýylynda sýdy tuzsyzdandyrý zaýytyn salý, Qarajambas ken ornynda tuzsyzdandyrý zaýytyn salý, Jańaózen qalasynda gaz óńdeý zaýytyn salý, Beineý-Jańaózen qubyryn qaita jańǵyrtý jobalary kózdelgen», - degen aktsionerlik qoǵam basshysy keshendi jospardaǵy bir jobanyń qarjylandyrý kózi áli naqtylanbaǵanyn eskertti.
«Sarsha eldi mekeni men Jyly jaǵajai aimaǵyn gazdandyrý jobalaryna jalpy quny 34 mlrd teńge qarjy bólý máselesiniń basy ashyq qalyp otyr. Buǵan deiin ol boiynsha biýdjet qarajatyn tartý kózdelgen bolatyn. Jospar jobasynda biýdjet qarajaty qarastyrylmaǵan. Respýblikalyq biýdjetten qarajat almai jobalardy oryndaý úshin gaz baǵasyn ósirý qajet bolady. QR Ulttyq ekonomika ministrligine tarifterdiń qajetti ósimi boiynsha bizdiń esebimizdi qaraýdy tapsyrýyńyzdy suraimyz», - dedi Almasadam Sátqaliev.
