«Samuryq-Qazyna» UÁQ Qytaidyń Sinopharm vaktsinasyn satyp alýyna qatysty túsinikteme berdi, dep habarlaidy QazAqparat.
«Vaktsina tańdaýǵa qatysty máseleni «Samuryq-Qazyna» ózi aiqyndamaidy. Bul «SQ-Farmatsiia» men Densaýlyq saqtaý ministrliginiń quzireti aiasyna kiredi. Iaǵni, olar mundai sheshimdi qajetti kólemde vaktsinanyń bolýyna, logistika men temperatýra rejimine bailanysty qabyldaǵan siiaqty. «Samuryq-Qazyna» qory 1 mln doza satyp alýǵa tólem jasaidy jáne qazirden-aq jetkizý bastaldy», - dedi «Samuryq-Qazyna» UÁQ Qoǵammen bailanys jáne marketingtik kommýnikatsiialar departamentiniń direktory Marat Muhamedsalimov.
Onyń atap ótýinshe, 1 mln doza vaktsina satyp alýǵa 31,1 mln dollar qarjy jumsaldy.
«Búgin vedomstvoaralyq komissiia otyrysynda 120 myń doza Qazaqstan boiynsha «Samuryq-qazyna» kompaniialar tobynyń jumysshylaryna egiletindigi týraly sheshim qabyldandy. Iaǵni, óndiristik kompaniialar men filialdarda eńbek etetin munaishylar, energetikter, poshta qyzmetkerleri, ushqyshtar, stiýardessalar alady. Al qalǵan 880 myń boza barlyq qazaqstandyqqa, niet bildirgen adamdarǵa qoljetimdi. Bastapqyda bul vaktsina «Samuryq-Qazyna» kompaniialar tobynyń jumysshylary úshin satyp alyndy degen aqparat taraǵan bolatyn. Ol - durys emes, qate aqparat», - dedi ol.
Aita keteiik, buǵan deiin «SQ-Farmatsiia» «Samuryq-Qazyna» Ulttyq ál-aýqat qory AQ ujymyn vaktsinatsiialaý úshin 1 000 000 doza mólsherinde koronavirýstyq infektsiiaǵa qarsy Hayat-Vax (SARS-CoV-2 (Vero Cell) vaktsinasynyń partiiasyn satyp alǵanyn habarlaǵan edik.
Qytaidyń «Sinopharm» kompaniiasy Birikken Arab Ámirlikterinde óndirgen Hayat-Vax (SARS-CoV-2 (Vero Cell) COVID-19 koronavirýstyq infektsiiasyna qarsy vaktsinasy +2 - +8 gradýsta saqtalady. 1 adamǵa vaktsinanyń 2 dozasyn engizý usynylady, ekinshi doza birinshi inektsiiadan keiin 14 kúnnen soń júrgiziledi.
