"QazMunaiGaz" ulttyq kompaniiasy "QazTransGazdyń" 100% aktsiiasyn "Samuryq-Qazyna" qoryna berdi. Mámile 9 qarashada jasaldy, onyń somasy – 1 teńge, dep habarlady QMG baspasóz qyzmeti.
9 qarashada sondai-aq QMG men Qor arasynda 2021 jyldyń 11 naýryzynda jasalǵan senimgerlik basqarý kelisimshartynyń kúshi joiyldy.
"2020 jyldyń 3 maýsymynda Qazaqstannyń Tuńǵysh Prezidenti – Elbasy Nursultan Nazarbaevtyń tóraǵalyǵymen ótken "Samuryq-Qazyna" qoryn basqarý jónindegi keńestiń tapsyrmasyn, sondai-aq Memleket basshysy Qasym-Jomart Toqaevtyń 2021 jyldyń 26 qańtarynda ótken Úkimettiń keńeitilgen otyrysyndaǵy gazdy barlaý, óndirý jáne tasymaldaý jónindegi ulttyq operatordy qurý týraly tapsyrmasyn oryndaý maqsatynda "QazTransGaz" UK" AQ aktsiialary qorǵa berildi", - delingen habarlamada.
Mámile jasalmas buryn birqatar zańdy jáne qarjylyq sharttar oryndalǵanyn, sonyń ishinde QMG kreditorlarynyń jáne tiisti memlekettik organdardyń kelisimin alý qajet bolǵanyn atap ótken jón. Birinshi kezeńde 2020 jyldyń qazan aiynda QMG 750 million AQSh dollary somasyna eýroobligatsiialardy qaita qarjylandyrdy, bul rette jańa shart boiynsha QTG-nyń shyǵý múmkindigi kózdelgen bolatyn. Kelesi kezeń barysynda 2021 jyldyń maýsymynda QTG-nyń bólinip shyǵýyna QMG eýroobligatsiialarynyń basqa ustaýshylarynan kelisim alyndy.
Sonymen qatar mámileniń jasalýy QMG-nyń kredit berýshi bankterimen, sonyń ishinde jekelegen qaryzdardy qarjylandyrý arqyly kelisildi. Atqarylǵan jumys kezeńderiniń biri Qazaqstan Úkimetiniń 2021 jyldyń 8 qarashasyndaǵy "Strategiialyq obektini ielikten shyǵarý týraly" qaýlysynyń qabyldanǵany boldy. Atalǵan qaýlyǵa sáikes "QazMunaiGaz» ulttyq kompaniiasyna QTG-nyń 100% aktsiiasy paketin qor paidasyna satyp alý-satý kelisimshart jasasý jolymen ielikten shyǵarý jónindegi mámileni jasaýǵa ruqsat berildi.
Qazirgi ýaqytta QMG-nyń barlyq kreditory QTG-ny qordyń jeke enshiles kompaniiasy etip shyǵarýǵa kelisimin berdi.
QTG-nyń bólinýi nátijesinde QMG qaryzy 1,1 milliard AQSh dollaryna (berilgen kepildikterdi eseptegende 1,6 mlrd dollarǵa) azaiady.
Eske sala keteiik, 2002 jyly ulttyq kompaniia qurylǵannan bastap QTG onyń quramynda boldy. QMG osy ýaqyt ishinde QTG kapitalyna aqsha men múlik túrinde shamamen 143 milliard teńge quidy. Bul rette QTG aktivteri 125 milliard teńgeden 2,5 trillion teńgege 20 eseden kóp ósti, kapital 61 milliard teńgeden 1,6 trillion teńgege artty, túsim jylyna 85 milliard teńgeden 900 milliard teńgege deiin kóbeidi.
QTG qurylǵan sátten bastap Qazaqstanda 10 myń shaqyrymnan asa magistraldy gaz qubyry salynyp, paidalanýǵa berildi. Búginde QTG 20 myń shaqyrymnan astam magistraldy qubyr joldaryn jáne 56 myń shaqyrymnan asa gaz taratý jelilerin basqaryp otyr.
