«Samuryq-Qazyna» kompaniialarynyń tiimdiligin arttyrý úshin naqty sharalar qabyldaý qajet. Bul týraly «Samuryq-Qazyna» ulttyq ál-aýqat qoryn basqarý jónindegi keńestiń otyrysynda Elbasy Nursultan Nazarbaev aitty, dep habarlaidy QazAqparat.
«Búgin biz «Samuryq-Qazyna» ulttyq ál-aýqat qoryn basqarý jónindegi keńestiń otyrysyn ótkizemiz. Qordyń ekonomikalyq damýda mańyzy óte zor. Sondyqtan «Samuryq-Qazynanyń» jumysy erekshe baqylaýymda. Barshamyzǵa málim, biyl qiyn jyl bolyp otyr. Koronavirýs pandemiiasy jahandyq ekonomikalyq daǵdarysqa ákeldi. Álemdik ekonomika jáne saýda aýqymy tómendedi. Bul faktorlardyń barlyǵy bizdiń elimizge óziniń áserin tigizedi. Osy oraida biz úshin qalyptasqan kúrdeli ahýalǵa tez beiimdelý óte mańyzdy. Sáýir aiynda biz daǵdarystan keiin ekonomikany qalai kóterýge bolatynyn talqyladyq. Prezident Qasym-Jomart Toqaev naqty sharalar týraly málimdeme jasady. Úkimet ekonomikalyq ósimdi qalpyna keltirý josparyn bekitti. Bul sharalar der kezinde qabyldandy jáne qazirgi ahýalǵa sai keledi», - dedi otyrysty ashqan QR Tuńǵysh Prezidenti.
Elbasy Qazaqstannyń barlyq negizgi kompaniialary «Samuryq-Qazyna» ulttyq ál-aýqat qoryna kiretindigin atap ótti. Qor kompaniialarynyń jalpy aktivi - 28 trln teńge.
«Bul - bizdiń jalpy ishki ónimniń 40 paiyzyna jaqyn. Bul jerde 300 myń qyzmetker jumys isteidi. Biýdjetke túsetin árbir onynshy teńge «Samuryq-Qazynadan» keledi. Qiyndyqqa qaramastan barlyq kompaniia jumysyn jalǵastyryp jatyr, toqtaǵan joq. Ótken jyldardaǵy qor kórsetkishteriniń oń dinamikasy biyl rezerv qurýǵa múmkindik berdi. Endi kompaniialardyń tiimdiligin arttyrý úshin naqty sharalar qabyldaý qajet», - dedi Nursultan Nazarbaev.
