Foto: video kadry
Májilis depýtaty Erlan Saiyrov "Samuryq-Qazyna" qorynyń basshylyǵy halyqtyń emes, ózderiniń ál-aýqatyn arttyrýǵa aianbai eńbek etip jatqanyn málimdedi, dep habarlaidy Sputnik Qazaqstan.
Depýtattyń aqparatynsha, "Samuryq-Qazyna" qorynyń enshiles "Samuryq-Qazyna Biznes Servis" kompaniiasynyń basshylyǵy kásiporynnyń tapqan paidasynan eki ese kóp bonýs alǵan.
"Kásiporyn basshysy bir jylda 74,9 mln teńge, al basshylyq 274 mln teńge bonýs jazyp alǵan. Kásiporynnyń taza paidasy 38,5 mln teńge ǵana. "Samuryq-Qazyna Biznes Servis" kompaniiasynyń enshiles kásiporny "Kaz Kloýd" kompaniiasynyń da basshylyǵyna degen jomarttyǵynda shek joq. Osy "Kaz Kloýd" menedjmenti kompaniianyń taza paidasy 61 mln teńge bola tura, premiia retinde bir jylda 336 mln teńge alǵan", - dep málimdedi Saiyrov Premer-ministr men Bas prokýrorǵa joldaǵan depýtattyq saýalynda.
Sondai-aq "Qazaqtelekom" basqarmasynyń músheleri jalpy 422 mln teńge premiia alǵan. Árbir múshesine 105 mln teńgeden keledi.
"Bizdiń qarapaiym halqymyz bir úzim nanǵa jarymai júrgende, bul netken asqandyq? "Samuryq-Qazyna" ulttyq ál-aýqat qorynyń basshylary, enshiles kásiporyndary óz basshylaryna bonýs, syiaqy jazyp alýǵa ǵana qyzmet ete me degen zańdy suraq týady!", - dep ashyndy májilismen.
Depýtattyń pikirinshe, "Samuryq-Qazyna" ulttyq ál-aýqat qory atyna zaty sáikes kelýi kerek.
Osyǵan bailanysty depýtattar:
• "Samuryq-Qazynanyń" óz menedjmentine "asyra siltep" premiia jazý saiasatynyń zańǵa sáikestigin anyqtap, bul ashkózdikti toqtatý;
• "Samuryq-Qazynadaǵy" enshiles kásiporyndardyń qajettigin anyqtaý;
• "Samruq-Qazynanyń" qarjy saiasatynyń ashyqtyǵyn qamtamasyz etý tetigin ázirleý qajet dep esepteidi.
