«Samuryq-Qazyna» UÁQ« AQ-da Modernizatsiialaý jónindegi keńestiń otyrysy ótip, onda qorǵa qarasty kompaniialardyń tsifrly transformatsiialaný barysy talqylandy, dep habarlaidy QazAqparat.
Keńes jumysyna Tsifrlyq damý, innovatsiialar jána aeroǵarysh ónerkásibi ministri Asqar Jumaǵaliev, qordyń basqarma tóraǵasy Ahmetjan Esimov jáne qorjyndyq kompaniialardyń basshylary qatysty.
Keńes otyrysyn ashqan Ahmetjan Esimov 2018 jyly transformatsiialaý baǵdarlamasy aitarlyqtai ózgeriske ushyraǵanyn atap ótti. Qor transformatsiialaý jáne tsifrlandyrý baǵdarlamalaryn biriktirip, olardy barynsha tiimdi jumys isteitin bir baǵdarlamaǵa ainaldyrǵan. Osylaisha, transformatsiialaý baǵdarlamasyna enetin jobalardy tańdaý joly da ózgerdi. Sebebi jobalardyń negizgi maqsaty «Samuryq-Qazynaǵa» qarasty qorjyndyq kompaniialardyń biznes úderisterin jaqsartý bolǵandyqtan, jobalar endi qatań tártippen irikteledi.
Osy ózgerister aitarlyqtai nátijeler kórsetken. Mysaly, 2018 jyly taza paida 28 mlrd teńgege jetse, 2019 jyly jobalardan kútiletin taza paida 40,7 mlrd teńgeni quraidy degen boljam bar.
«Ótken jyly kútiletin paidasy zor ekendigin kórsetip, jobalarǵa aitarlyqtai mol biýdjet suraǵan qorjyndyq kompaniialarmen qyzý pikir talastyrǵan edik. Olarǵa baǵyndyrylatyn naqty kórsetkishterdi kórsetýge týra keldi. Esesine búgin ózderi baiandaityn jobalar shynymen de tabys ákelip, básekelestik artyqshylyqtary baryn bilemiz», - deidi qordyń basqarma tóraǵasy Ahmetjan Esimov.
Qorjyndyq kompaniialar tsifrly transformatsiialaý boiynsha ózderiniń negizgi jobalaryn tanystyrdy. «QazMunaiGaz» UK» AQ munai óńdeý zaýyttaryndaǵy jóndeýaralyq kezeńdi uzartatyn jobasyn; «Qazaqstan Temir Joly» UK» AQ tasymaldaý qujattaryn qaǵaz túrinde rásimdeý ádisinen elektrondy formatqa aýysý jobasyn; «Qazposhta» AQ «Qazaqstan Respýblikasynda V2V2S qyzmetterin damytý» jobasyn tanystyrdy. Jalpy, jańartylǵan baǵdarlamaǵa 56 joba men 98 is-shara engen.
«Samuryq-Qazyna» - Qazaqstandaǵy tsifrlandyrý baǵdarlamasyndaǵy negizgi oiynshylardyń biri. Qordyń tsifrlandyrý jobalary ambitsiiaǵa toly. Olar el ekonomikasyn tsifrlandyrýǵa aitarlyqtai úles qosatynyna senimdimin«,- dep atap ótti Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev.
Tsifrly transformatsiialaý baǵdarlamasynyń maqsaty - kompaniialar tobynyń tiimdiligin arttyrý arqyly negizgi óndiristik máselelerdi sheship, strategiialardy júzege asyrý.
Esterińizge sala keteiik, ótken jylǵy keńeste «Samuryq-Qazyna» basshysy Ahmetjan Esimov transformatsiialaý baǵdarlamasyn Qorǵa qarasty qorjyndyq kompaniialardyń biznestegi mindetterine barynsha sáikestendirýdi, «aýadan» alynatyn tsifrlardy azaityp, transformatsiialaý arqyly árbir kompaniianyń tabysyn kóbeitetin jańa sheshimder tabýdy tapsyrǵan bolatyn.
