«Samuryq-Qazyna» AQ-nyń qyzmetkerler shtaty 2 ese qysqartyldy. Bul týraly atalǵan kompaniianyń qoǵammen bailanys jáne ózgeristerdi basqarý jónindegi direktory Ǵibrat Aýǵanov málim etti, dep habarlaidy QazAqparat.
«Memleket basshysynyń tapsyrmasynan keiin kompaniiada birqatar shara qolǵa alyndy. Aýqymdy jumys júrip jatyr. Shtat 2 esege qysqartylyp, qyzmetkerlerdiń sany azaidy. Basqarý laýazymy da eki esege deiin qysqardy. Sonymen qatar kompaniiadaǵy keńesshiler institýty men qordyń sheteldegi ókildikteri jabyldy», - dedi Ǵibrat Aýǵanov onlain ótken baspasóz máslihatynda.
Onyń aitýynsha, biyl 1 sáýirden bastap «Samuryq-Qazyna» AQ-da satyp alýdyń jańa erejesi engizildi.
«Satyp alýdyń jańa erejesi qoǵam men quzyrly organdardyń talqysynan ótti. Jańa erejede biz barynsha ashyqtyqty qamtamasyz etýge tyrystyq. Laýazymdy tulǵalar men qyzmetkerlerdiń korporativtik jáne áleýmettik jaýapkershiligi kúsheitildi. Sol siiaqty atalǵan salaǵa jaýapty jetekshiler taǵaiyndaldy. Taǵy bir aityp ótetin jait, biyl jyl basynda óndiristik qyzmetkerlerdiń jalaqysy artty. Odan bólek, birqatar áleýmettik-qaiyrymdylyq baǵyttaǵy is-sharalar iske asyp jatyr», - deidi ol.
