«Aqtóbe» FK senimgerlik basqarýǵa berildi. Fýtbol klýbynyń endigi qojaiyny - Samat Smaqov, dep habarlaidy "Ult aqparat".
Aqtóbe oblysy ákiminiń baspasóz qyzmeti «Aqtóbe» fýtbol klýbyn senimgerlik basqarýǵa berýge qatysty aqparat taratty. Aldaǵy 7 jylda Samat Smaqov klýbqa ielik etip, onyń damýyna úles qosady.
«QR Úkimetiniń 2015 jylǵy 30 jeltoqsandaǵy №1141 qaýlysyna sáikes, 2016-2020 jyldarǵa arnalǵan jekeshelendirýdiń keshendi jospary bekitildi. Aqtóbe oblysy boiynsha jekeshelendirý nysandarynyń tizimine toǵyz kommýnaldyq-jekemenshik nysany kirdi. Onyń ishinde «Aqtóbe» fýtbol klýby da bar. «Aqtóbe» fýtbol klýbynyń elektrondy saýdasy úsh ret ótkizildi. 2018 jyly 20 qarashada ótken saýda-sattyqtyń nátijesi boiynsha Smaqov Samat Kabiruly jeńimpaz atandy. Ol úshinshi saýda-sattyqtyń jalǵyz qatysýshysy boldy», - dep habarlady oblys ákiminiń baspasóz qyzmeti.
Klýb 108 million teńgege senimgerlik basqarýǵa berildi. Bastapqy quny 100 million teńge bolatyn. Kelisim boiynsha Premer-Liganyń klýbtaryna qoiylatyn reglamentterge sáikes, klýbtyń barlyq qajetti jarystar men saiystarǵa qatysýyn qamtamasyz etý (QR Chempionaty, QR Kýbogynyń oiyndary, Premer-Liga klýbtary qosalqy quramdarynyń týrniri, PFL Kýbogy, Premer-Liga klýbtarynyń jasóspirimder men jastar komandalary, birinshi Liga jáne mini fýtbol komandasy arasyndaǵy QR birinshiligi), sonymen qatar, ÝEFA saiystaryna qatysý týraly quqyǵyn alǵan jaǵdaida jarysqa barý mindetteledi.
Jańa basshylyqqa qazirgi kadrdyń 75 paiyzyn saqtap, ǵimaratqa jóndeý jumystaryn júrgizý qajet. Kreditorlyq bereshekterdi óteý, kreditorlyq jáne debitorlyq bereshektiń negizsiz qalyptasýyna jol bermeý, nysandy kreditorlyq jáne debitorlyq bereshekterimen qabyldaý, balalar, onyń ishinde Aqtóbe oblysynyń aýdandarynda balalar fýtbolyn damytý talaby qoiyldy.
