Qazaqstandyq aktrisa, Kann kinofestivaliniń júldegeri Samal Esliamova Aqqaiyń aýdany Aralaǵash aýylynyń turǵyndarymen kezdesti, dep habarlaidy "Ult aqparat".
Óńirlik kommýnikatsiialar qyzmetiniń aqparaty boiynsha, aýyl turǵyndarymen kezdesý Samal oqyǵan K.Orazov atyndaǵy orta mektepte ótken.
«Búgin búkil álem Qazaqstan týraly, elimizdiń ekonomikalyq jáne saiasi jetistikter týraly biledi. Óz ónerińizben, talantyńyzben elimizdiń, oblysymyz ben aýdanymyzdyń atyn shyǵarǵanyńyz úshin qýanyshtymyz», - dep atap ótti Aqqaiyń aýdanynyń ákimi Dáýren Baitóleshov.
Ol Samaldyń ata-anasy men ustazdaryna tálim-tárbie bergeni úshin alǵys aitty.
«Samal oqýshy kezinde sypaiy, sabyrly jáne jaýapty qyz boldy. Ol barlyq tapsyrmalarǵa jaýapty qaraityn. Onyń baisaldylyǵy álige deiin boiynda saqtalyp qalǵan. Ony Kann festivalinde marapattaý kezinde kórdińizder», - dedi synyp jetekshisi Gúlnaz Bekmaǵambetova.
Samal týǵan aýyly, mektebi týraly aita otyryp, Aralaǵashta alǵash ret bilim alǵanyn tilge tiek etti.
«Ómirimniń alǵashqy bóligi Aralaǵashta ótti. Men osy jerde óstim, bilim aldym. Dál osy jerde alǵashqy bilimim qalandy. Birneshe jyldan beri Máskeýde turatynyma qaramastan, óz Otanym týraly sóz alǵanda Petropavldy emes, Aralaǵash týraly aitamyn», - dep bólisti aktrisa.
