Qazaqstan halqy salyqtyq bereshek týraly málimetti SMS-habarlama arqyly bile alady. Bul týraly Parlament Májilisindegi Úkimet saǵatynda QR Qarjy ministri Álihan Smaiylov aitty, dep habarlaidy "Ult aqparat".
Búgingi otyrys barysynda salyqtyq bereshek týraly azamattardy aldyn ala eskertý júiesin engizýge qatysty depýtat Irina Aronova tiisti usynys jasady.
«Salyqtyq bereshekke bailanysty bizdiń azamattar elimiz shekarasynan óte almaidy. 2018 jyldyń maýsymyndaǵy jaǵdai boiynsha tórt myńǵa jýyq azamatta elimizden shetelge saparlaýǵa shekteý boldy. Ókinishke qarai, bul jaiynda salyq tóleýshilerdiń kóbisi baqylaý beketinen ótý kezinde tek áýejaida habardar boldy. Bul óz kezeginde josparlanǵan saparyna shyǵa almaǵan azamattardyń ýaqyt ári qarjy shyǵyndaryna alyp keledi. Osy oraida, salyqtyq qaryzy týraly jeke adamdarǵa SMS-eskertýdi aldyn ala joldaý múmkindigi bar ma?», - dedi I. Aronova Qarjy ministrine qarata aitqan sózinde.
Óz kezeginde Álihan Smaiylov, árbir salyq tóleýshi óziniń bereshegi jaiynda e-gov portalynda, Qarjy ministrliginiń salyq tóleýshi jeke kabinetinde, banktiń onlain-servisi arqyly bile alatynyn atap ótti.
«Sonymen qatar, biz eki óńirde qanatqaqty jobany júrgizýdemiz. Bul turǵyda Soltústik Qazaqstan men Qaraǵandy oblystarynda kólik quraldaryna qatysty tólemder týraly salyq tóleýshilerge málimetterdi baǵyttaimyz. Osynyń nátijesinde biyl salyqtyq bereshektiń barlyq túri boiynsha Qazaqstan aýmaǵynda SMS-eskertýdi engizýdi josparlap otyrmyz», - dedi vedomstvo basshysy.
