قازاقستان حالقى سالىقتىق بەرەشەك تۋرالى مەلٸمەتتٸ SMS-حابارلاما ارقىلى بٸلە الادى. بۇل تۋرالى پارلامەنت مەجٸلٸسٸندەگٸ ٷكٸمەت ساعاتىندا قر قارجى مينيسترٸ ەليحان سمايىلوۆ ايتتى, دەپ حابارلايدى "ۇلت اقپارات".
بٷگٸنگٸ وتىرىس بارىسىندا سالىقتىق بەرەشەك تۋرالى ازاماتتاردى الدىن الا ەسكەرتۋ جٷيەسٸن ەنگٸزۋگە قاتىستى دەپۋتات يرينا ارونوۆا تيٸستٸ ۇسىنىس جاسادى.
«سالىقتىق بەرەشەككە بايلانىستى بٸزدٸڭ ازاماتتار ەلٸمٸز شەكاراسىنان ٶتە المايدى. 2018 جىلدىڭ ماۋسىمىنداعى جاعداي بويىنشا تٶرت مىڭعا جۋىق ازاماتتا ەلٸمٸزدەن شەتەلگە ساپارلاۋعا شەكتەۋ بولدى. ٶكٸنٸشكە قاراي, بۇل جايىندا سالىق تٶلەۋشٸلەردٸڭ كٶبٸسٸ باقىلاۋ بەكەتٸنەن ٶتۋ كەزٸندە تەك ەۋەجايدا حاباردار بولدى. بۇل ٶز كەزەگٸندە جوسپارلانعان ساپارىنا شىعا الماعان ازاماتتاردىڭ ۋاقىت ەرٸ قارجى شىعىندارىنا الىپ كەلەدٸ. وسى ورايدا, سالىقتىق قارىزى تۋرالى جەكە ادامدارعا SMS-ەسكەرتۋدٸ الدىن الا جولداۋ مٷمكٸندٸگٸ بار ما?», - دەدٸ ي. ارونوۆا قارجى مينيسترٸنە قاراتا ايتقان سٶزٸندە.
ٶز كەزەگٸندە ەليحان سمايىلوۆ, ەربٸر سالىق تٶلەۋشٸ ٶزٸنٸڭ بەرەشەگٸ جايىندا e-gov پورتالىندا, قارجى مينيسترلٸگٸنٸڭ سالىق تٶلەۋشٸ جەكە كابينەتٸندە, بانكتٸڭ ونلاين-سەرۆيسٸ ارقىلى بٸلە الاتىنىن اتاپ ٶتتٸ.
«سونىمەن قاتار, بٸز ەكٸ ٶڭٸردە قاناتقاقتى جوبانى جٷرگٸزۋدەمٸز. بۇل تۇرعىدا سولتٷستٸك قازاقستان مەن قاراعاندى وبلىستارىندا كٶلٸك قۇرالدارىنا قاتىستى تٶلەمدەر تۋرالى سالىق تٶلەۋشٸلەرگە مەلٸمەتتەردٸ باعىتتايمىز. وسىنىڭ نەتيجەسٸندە بيىل سالىقتىق بەرەشەكتٸڭ بارلىق تٷرٸ بويىنشا قازاقستان اۋماعىندا SMS-ەسكەرتۋدٸ ەنگٸزۋدٸ جوسپارلاپ وتىرمىز», - دەدٸ ۆەدومستۆو باسشىسى.
