Búgin Premer-ministr Baqytjan Saǵyntaev Úkimet otyrysynda Elbasynyń tabysy tómen jumysshylarǵa salynatyn salyqty azaitý týraly bastamasyna orai birqatar ministrlikke tapsyrma berdi, dep habarlaidy Baq.kz.
«Ekinshi bastama – jalaqysy tómen jumysshylardyń eńbekaqysyn kóbeitý úshin olardyń salyq júktemesin azaitý. Ulttyq ekonomika ministrligi Qarjy, Eńbek jáne halyqty áleýmettik qorǵaý ministrlikterimen birlesip, 2019 jyldyń 1 qańtarynan bastap ai saiyn eń tómengi eseptik kórsetkishtiń 25 eselengen kóleminen az jalaqy alatyn jumyskerlerge salynatyn jeke tabys salyǵynyń mólsheri 1 % bolyp qamtamasyz etilsin. Bul jerde salyqty azaitýdan shyǵatyn qarjy olardyń jalaqysyn kóterýge baǵyttalýyn qamtamasyz etý kerek. Sondai-aq, tabys salyǵynyń progressivti shkalasyn engizý múmkindigin zerdelep, osy jyldyń 1 shildesine deiin naqty usynystar engizilsin. Jaýapty – ministr Súleimenov», - dedi Baqytjan Saǵyntaev búgingi Úkimet otyrysynda.
