Munaily emes túsimder kóleminiń ulǵaiýy salyq túsimderi turaqtylyǵynyń nyǵaiǵanyn kórsetip otyr.
Bul týraly Parlament Májilisinde «2020-2022 jyldarǵa arnalǵan respýblikalyq biýdjet týraly» zań jobasyn tanystyrý barysynda QR birinshi qarjy vitse-ministri Berik Sholpanqulov málim etti, dep habarlaidy QazAqparat.
«Respýblikalyq biýdjetti josparlaý negizine salynǵan bazalyq makroekonomikalyq stsenarii JIÓ-niń údemeli ósýin, infliatsiianyń ortasha jyldyq dáliziniń 2022 jyly 3-5 paiyzǵa deiin tómendeýin qamtamasyz etedi. 2020 jylǵa arnalǵan biýdjet tapshylyǵy 2022 jyly 1 paiyzǵa deiin tómendetilip, JIÓ-niń 2,1 paiyzy deńgeiinde josparlandy», - B. Sholpanqulov.
Onyń sózine qaraǵanda, jańa áleýmettik bastamalardy iske asyrýdy jáne óńirlerdi damytýdy jalǵastyra otyryp, kepildik berilgen transfert 2020-2021 jyldary 1,1 trln teńgege ulǵaityldy. 2022 jyldan bastap ol kezeń-kezeńmen 2 trln teńgege tómendeitin bolady. Zań jobasynda ol 2020-2021 jyldary 2,7 trln teńge jáne 2022 jyly 2,6 trln teńge somasynda kózdelgen.
«Munaily emes túsimder kóleminiń ulǵaiýy salyq túsimderi turaqtylyǵynyń nyǵaiǵanyn kórsetip otyr. Ekonomikanyń damý qarqynynyń artýy, kedendik jáne salyqtyq ákimshilendirýdiń jaqsarýy jáne olardy tsifrlandyrý ózgeristerdiń negizgi faktorlary boldy. Osy baǵyttaǵy jumys salyqtyq jáne kedendik aqparattyq júieler keshenin biriktirý jolymen jalǵasýda. Bul rette shaǵyn jáne orta biznesten túsetin korporativtik tabys salyǵynyń túsimderi jergilikti biýdjetter bazasyna berildi», - dedi birinshi vitse-ministr.
Berik Sholpanqulovtyń aitýynsha, tutastai alǵanda, respýblikalyq biýdjettiń kiristeri (transfertterdi esepke almaǵanda) úsh jyldyq kezeńde: 2020 jyly - 8,0 trln teńge nemese JIÓ-ge 10,7%; 2021 jyly - 8,6 trln teńge nemese JIÓ-ge 10,6%; 2022 jyly - 9,4 trln. teńge nemese JIÓ-ge 10,6% quraidy.
