QR Qarjy ministrliginiń Memlekettik kirister komiteti aǵymdaǵy jyldyń 1 tamyzdaǵy jaǵdai boiynsha jeke tulǵalardyń tólenbegen salyǵynyń jalpy somasy 19,4 mlrd teńgeni quraitynyn jariia etti, dep habarlaidy QazAqparat tilshisi.
«Aǵymdaǵy jyldyń 1 tamyzyndaǵy jaǵdai boiynsha, jeke tulǵalardyń tólenbegen salyǵynyń jalpy somasy 19,4 mlrd teńgeni quraidy. Ýaqytynda tólenbegendikten, eseptelgen ósimpul somasy - 7,5 mlrd teńge. Osylaisha jeke tulǵalardyń salyq beresheginiń jalpy somasy 26,9 mlrd teńgeni qurap otyr. Aǵymdaǵy jyldyń basymen salystyrǵanda jeke tulǵalar boiynsha bereshek 6,7 mlrd teńgege nemese 52 paiyzǵa ósti», - delingen komitet taratqan aqparatta.
Sonymen, atalǵan vedomstvo málimetine sáikes, jeke tulǵalar boiynsha salyq beresheginiń eń úlken somasy myna aimaqtarda tirkelgen: Almaty qalasynda jalpyrespýblikalyq salyq bereshegi somasynan 7,2 mlrd teńge nemese 27,0 paiyz; Astana qalasy jalpyrespýblikalyq salyq bereshegi somasynan 3,6 mlrd teńge nemese 13,3%; Almaty oblysy jalpyrespýblikalyq salyq bereshegi somasynan 3,1 mlrd teńge nemese 11,4%; Túrkistan oblysy jalpyrespýblikalyq salyq bereshegi somasynan 2,7 mlrd teńge nemese 9,9%; Qaraǵandy oblysy jalpyrespýblikalyq salyq bereshegi somasynan 1,8 mlrd teńge nemese 6,8%.
Respýblika boiynsha jalpy boryshkerler sany 1 409 864 adamdy quraidy. Bul rette jyldyń basymen salystyrǵanda tólemeýshiler sany 179 484 adamǵa nemese 14,6 paiyzǵa ulǵaiǵan.
Boryshkerlerdiń eń kóbi myna aimaqtarda tirkelgen: Almaty oblysynda - 212 180 jeke tulǵa; Túrkistan oblysynda - 209 239 jeke tulǵa; Astana qalasynda - 137 574 jeke tulǵa; Almaty qalasynda - 127 219 jeke tulǵa jáne Jambyl oblysynda - 120 016 jeke tulǵa.
«Jeke tulǵalardyń kólik salyǵy 20,2 mlrd teńge nemese salyq beresheginiń jalpy sommasynyń 75,1 paiyzyn quraidy. Bul rette kólik salyǵy boiynsha boryshkerler sany - 842 213 adam. Kólik salyǵy boiynsha eń úlken bereshek sommasy myna aimaqtarǵa tiesili: Almaty qalasynda 4,9 mlrd teńge; Astana qalasynda 3,0 mlrd teńge; Túrkistan oblysynda 2,2 mlrd teńge; Almaty oblysynda 2,0 mlrd teńge; Jambyl oblysynda 1,5 mlrd teńge», - dep atap ótedi komitettiń baspasóz qyzmetinen.
