Salyq bereshegi bar azamattar 20 myń teńge aiyppul tóleidi degen aqparat jalǵan. Memlekettik kirister komiteti osyndai qaýesetti joqqa shyǵardy, dep habarlaidy "Ult aqparat" komitettiń baspasóz qyzmetine silteme jasap.
«Sońǵy ýaqytta áleýmettik jeliler men messendjerler arqyly ótken salyqtyq kezeńder úshin bereshegi bar azamattar boryshyn biylǵy 1 qazanǵa deiin ótemegen jaǵdaida 8 AEK (20 000 teńge shamasynda) kólemindegi aiyppul esepteletini týraly habarlama taratylýda. QR QM Memlekettik kirister komiteti bul aqparattyń shyndyqqa janaspaitynyn resmi túrde habarlaidy», delingen habarlamada.
Komitettiń málimetinshe, jeke tulǵalar biýdjetke jer jáne múlik salyqtaryn ótken jyl úshin biylǵy jyldyń 1 qazanyna deiin tóleýi tiis. Kólik salyǵy aǵymdaǵy jyl úshin 31 jeltoqsanǵa deiin óteledi.
«Qoldanystaǵy QR Salyq zańnamasynda aiyppul esepteý sharalary kórsetilmegen. Tek salyqty ýaqytyly tólemegen jaǵdaida ótkizilgen ár kúnge ósimpul esepteledi. Sondai-aq, jyldyń aiaǵyna deiin jeke tulǵalarǵa arnalǵan salyqtyq raqymshylyq úrdisi júrýde. Onyń erejelerine sáikes, jeke tulǵa beresheginiń negizgi somasyn ótegen jaǵdaida ósimpul avtomatty túrde esepten shyǵarylady», delingen habarlamada.
Salyq tóleýshiler boryshynyń bar-joǵyn Memlekettik kirister komitetiniń saitynda nemese myna silteme boiynsha teksere alady.
