«Prezident indetpen kúres júrgizip jatqan meditsina, quqyq qorǵaý qyzmetkerleriniń jalaqysyna qosymsha bir ailyq jalaqy qosyp berý jóninde tapsyrma júktedi. Bul biz úshin úlken motivatsiia». Bul týraly Túrkistan oblysy qoǵamdyq densaýlyq basqarmasy basshysynyń mindetin atqarýshy Saltanat Jamalova aitty, dep habarlaidy QazAqparat.
«Búginde Qazaqstan halqy kúrdeli ahýaldy bastan ótkerip jatyr. Osy oraida el Prezidenti Qasym-Jomart Toqaev meditsina qyzmetkerlerine asa úlken senim men jaýapkershilik artyp otyr. Bul senim údesinen shyǵyp, halyqtyń densaýlyǵyn saqtaýdy biz abyroily mindetimiz dep sanaimyz. Osy rette men barsha áriptesterimdi abyroily jumys isteýge shaqyrǵan bolar edim», - deidi ol.
Sondai-aq, Saltanat Jamalova iri qalalardyń karantinge jabylýyn der kezinde qolǵa alynǵan shara dep baǵalaitynyn aitty: «Memleket basshysy búgingi málimdemesinde birinshi másele retinde- koronavirýstyń taralýyna qarsy jumystardy kúsheitýdi atap ótti. Óitkeni jahandyq indetke balanyp otyrǵan derttiń taralý aýmaǵy keńeiip, ýshyǵyp barady. Qazirdiń ózinde búkil álem boiynsha bul dertke júz myńdaǵan astam adam shaldyǵyp otyr. Bul virýstyń taralý jyldamdyǵy báseńdemei otyr degen sóz. Bir qýanarlyǵy, bizdiń memleket indetpen kúres jumystaryn myqtap qolǵa alyp, birqatar naqty shekteýlerdi jolǵa qoidy. Iri-iri eki qalamyzda karantin jariialanyp, kirip-shyǵý shektetildi. Muny der kezinde qolǵa alynǵan sharalar dep esepteimiz».
Túrkistan oblysy qoǵamdyq densaýlyq basqarmasy basshysynyń mindetin atqarýshy osynaý qiyn kúnde aýrýmen maidannyń aldyńǵy shebinde júrgen mamandardy qoldaýdyń da mańyzdylyǵyn atap ótti.
«Búgingi sózinde prezidentimiz indetpen kúres júrgizip jatqan meditsina, quqyq qorǵaý qyzmetkerleriniń jalaqysyna qosymsha bir ailyq jalaqy qosyp berý jóninde tapsyrma júktedi. Bul biz úshin úlken motivatsiia ekeni daýsyz. Eń bastysy jalaqy emes, halyqtyń densaýlyǵy men qaýipsizdigi dep esepteimiz», - dedi ol.
