Foto: Aitbek Amangeldiginiń jeke arhivinen
Burynǵy ekonomika ministri Qýandyq Bishimbaevqa qatysty sot otyrysynda qazaqstandyq tanymal kásipker Raiymbek Batalovtyń da esimi ataldy. Kóptiń kókeiinde júrgen suraqqa jábirlenýshi Saltanat Núkenovanyń aǵasy Aitbek Amangeldi Instagram-daǵy paraqshasynda jaýap berip, áńgimeniń núktesin qoidy, dep habarlaidy «Ult aqparat».
"Búgin basty sot tergeýi aiaqtaldy. Beinejazbalardy qaita qaradyq jáne men qazir tek bir máseleni talqylap, núktesin qoiǵym keledi. Óitkeni bul taqyryp óte mańyzdy. Men bul týraly sońǵy ret aityp otyrmyn dep úmittenemin. Men qazir Linara jáne Raiymbek Batalovtarǵa heit ketip jatqanyn bilemin. Men olar da sot otyrysynan zardap shekken basqa da taraptar sekildi jábirlenýshi dep oilaimyn. Olar da osy ýaqyt aralyǵynda óziniń psihikalyq turaqtylyǵyn joǵaltqan búkil Qazaqstan halqy siiaqty", – dedi marqumnyń aǵasy.
Sonymen qatar Aitbek sottalýshynyń oiyndaǵy nárse tek onyń miynda ekenin aitady.
"Keshe biz telefonnan beinejazbany qaraǵan kezde sýdia videolardyń aiaq jaǵyn ǵana qoidy. Sondyqtan kópshilik túsinbei qaldy. Videonyń basynda Saltanat uzaq ýaqyt boiy ózine qoiylǵan suraqtarǵa naqty jaýap beredi, al aiyptalýshy suraqtyń jaýaby ózine yńǵaily bolmaiynsha qaitalap qoia berdi", – deidi Aitbek Amangeldi.
Aitbek Amangeldiniń aitýynsha, beinejazbada Saltanat pen tanymal kásipker Raiymbek Batalov ekeýin eshnárse bailanystyrmaidy. Marqumnyń aǵasy olardyń aralarynda eshnárse joǵyn naqtylap ótti.
"Men budan basqa qandai túsinikteme, dálel qajet ekenin bilmeimin. Shynymdy aitsam maǵan báribir. Sot aiasynda biz bárin dáleldedik. Videonyń bul bóligi nelikten tikelei efirde estilmegenin bilmeimin. Óitkeni biz adamdar Saltanattyń daýysyn estýi úshin ádeii osy videony tyńdaýǵa qoiǵan bolatynbyz. Sondyqtan bul jai ǵana – fakt. Ol aýrý suraǵyna jaýap alý úshin ony túni boiy azaptady. Men onyń nege Raiymbek Batalovqa sonsha qyzǵanyshpen qaraitynyn bilmeimin, túsinbeimin”, – dedi Aitbek Amangeldi.
Budan bólek ol aiyptalýshynyń ózine qyzǵanýǵa sebep oilap taýyp, motiv jasaǵanyn atap ótti.
