Foto: QR MAM
2025 jyldyń 1–2 tamyz kúnderi Qyrǵyzstanda dástúrli mádeniet pen mýzykaǵa arnalǵan alǵashqy «Rýh-sanaty» Dúniejúzilik festival-baiqaýy ótti, dep habarlaidy Ult.kz.
Dástúrli óner salasyndaǵy iri halyqaralyq festivalge 37 elden kelgen júzden astam oryndaýshy qatysty. Qazylar alqasynyń quramynda túrli elderden kelgen tanymal mýzyka zertteýshileri, etnograftar men óner sheberleri boldy. Olar qatysýshylar oryndaǵan shyǵarmalardyń túpnusqasy saqtalýyn, dástúrli mýzykalyq aspaptardy meńgerý deńgeiin jáne ulttyq mádeni dástúrlerdiń saqtalýyn baǵalady.
Qazaqstan atynan festivalge K.Baiseiitova atyndaǵy Qazaq ulttyq óner ýniversitetiniń stýdenti Saltanat Ersultan qatysty. Saltanat «Animatsiialyq kino rejissýrasy» mamandyǵyn támamdaǵan, qazirgi kezde ýniversitette «Dástúrli án» baǵyty boiynsha 3-kýrsta oqidy.
Baiqaý barysynda Saltanat Asan Qaiǵynyń tolǵaýyn, Nartaidyń termesin jáne Elmura Jańabergenniń «Aralym» atty shyǵarmasyn oryndady. Ónerpaz qyl qobyzda jyr-terme oryndap, qazylar alqasyn tánti etti. Osylaisha ol jeke oryndaýshylar arasynda birinshi oryndy ielendi.
