QR Tótenshe jaǵdailar ministri Iýrii Ilin Abai shahtasynda tekserý júrgizgen Úkimettik komissiia anyqtaǵan derekterdi aitty, dep habarlaidy QazAqparat.
«K10 dep atalatyn jeldetý shtreginiń kenjarynda 2-4 qarasha aralyǵynda ken barlaý jáne jol arshý jumystaryna daiyndyq júrgizilgen. Sonyń arqasynda gazdinamikalyq qubylystyń áseri báseń bolǵan jáne metannyń taralý aýqymy shektelgen. Dál 7 qarasha kúni saǵat 8.00-de tehnikalyq aýysym jumysqa kirisip, daiyndyqty jalǵastyrǵan. Iaǵni, eshqandai burǵylaý jumystary júrgizilgen joq. Birinshi aýysym jumysqa kiriskennen keiin 20 minýt ótkende metan kontsentratsiiasynyń artýy tirkelgen. Onyń mólsheri ár 20-30 sekýnd saiyn óse kelip, shekti mán – 41%-ǵa jetedi. Bul densaýlyqqa qaterli mólsher qalyptasty degen sóz edi», - dedi Iýrii Ilin Qaraǵandy oblysyndaǵy óńirlik kommýnikatsiialar qyzmetinde ótken brifinginde.
Ministr zardap shekkender budan da kóp bolýy múmkin edi dep otyr.
«Shahtadaǵy gaz mólsherin baqylaityn kezekshi dispetcherdiń jedel áreketiniń arqasynda elektr qýaty dereý ajyratylyp, jumysshylardy evakýatsiialaý týraly sheshim shyǵarylǵan. Sonyń arqasynda kóz jumǵandar sany - 6 adam boldy. Shahtada ot tutanǵan jaǵdaida ondaǵy 64 adam túgel qaza tabýy múmkin edi», - dedi Iýrii Ilin.
Ministrdiń aitýynsha, qaitys bolǵan 6 adam ainalasy 2-3 minýttyń ishinde ýlanǵan.
«Oqiǵa óte jyldam órbigen. Kenjarda qalǵan 6 adam ainalasy 2-3 minýttyń ishinde ýlanyp úlgergen. Elektr qýaty ajyratylǵanyn kórgen shahta jumysshylarynyń biri ózdiginen qutqarý jumysyn bastap ketken. Sonyń arqasynda 2 kenshi aman qalyp otyr», - dep túiindedi Tótenshe jaǵdailar ministri.
