Foto: Máýlen Muqataev. "Astana Opera" teatry
QR eńbek sińirgen ártisi Maira Muhammedqyzynyń sahnada júrgenine 30 jyl tolýyna orai «Astana Operada» tanymal opera ánshisiniń jeke shyǵarmashylyq kontserti ótti.
Ótken senbide ótken kontsertte Rihard Shtraýstyń «Tak skazal Zaratýstra», Frants Shýberttyń «Serenadasy», sondai-aq, Ahmet Jubanov pen Latif Hamididiń «Mairasy», Abai Qunanbaevtyń «Kózimniń qarasy» siiaqty jiyrmadan artyq shyǵarmaldar oryndaldy.
Maira Muhamedqyzynyń ózi kontsertte 30 jylda oryndaǵan ánderiniń ishinen iriktep-tańdap, úzdik shyǵarmalary oryndaǵanyn aitty. Ol óz sózinde shyǵarmashylyq jolynda bai tájiribe jinaǵanyn, kontsertte sonymen bóliskisi keletinin aitty.
«Ómirbaianyma jaqyndastyryp, kontserttik baǵdarlama qurdyq»
«Sahnada 30 jyl júrý bireýge kóp, bireýge az. Biraq sahnanyń qyzyǵyna batyp júrip, ýaqyttyń qalai tez ótip ketkenin sezbei de qaldym. Sahnada ne aitsam eken, neni kórsete alamyn dep oilana otyryp, 30 jylda qandai tájiribe jinadym dep artyma úńilsem, 50 shaqty operanyń basty rólderin aityppyn, kompozitorlardyń áninen bólek 100 qazaqtyń halyq ánin oryndappyn. Sondyqtan meniń qorjynymda biraz dúnieler bar. Sodan ózim oryndaǵan barlyq shyǵarmalardyń arasynan irikteýime týra keldi. Bir shyǵarmany tańdasam, ekinshisin qimaimyn. Barlyq jaqsy shyǵarmalardy halyqqa kórsetkim keledi. Sonymen tańdap, rejissermen aqyldasyp, meniń bala kúnimnen bastap, Shymkent opera jáne balet teatry direktory qyzmetine deiingi júrip ótken jolymdaǵy shyǵarmalardyń injý-marjandaryn tańdap, ómirbaianyma jaqyndastyryp, 2 saǵattyq kontserttik baǵdarlamany qurdyq», -deidi Maira Muhamedqyzy.
Tanymal opera ánshisiniń sahnadaǵy 30 jyldyq mereitoiyna bailanysty ótkizilgen kontsertiniń ereksheligi eshqandai júrgizýshi bolmaýynda. Ánshiniń barlyq ómir joly úlken ekranda jazylyp turdy. Mundaǵy ánshiniń maqsaty óziniń ómiri men shyǵarmashylyq jolyn ánmen jetkizý.
Kontsertte Maira Muhamedqyzy oryndaǵan ánderdiń arasynda óte kúrdeli shyǵarmalar bar. Mysaly Eitor Villa-Lobostyń «Brazilskaia bahiana No5» degen shyǵarmasyn ekiniń biri aita almaidy eken.
«Óitkeni ol shyǵarmada adamdardyń ishki jan dúniesindegi jan aiqaiy beriledi. Basqasha aitqanda, Quran baǵyshtaǵan siiaqty áser beretin óte aýyr shyǵarma. Buny baiaǵyda kompozitor 8 violonchelge arnap jazǵan. Sony orkestormen emes, 8 violoncheldiń súiemeldeýimen aityp kórsem qaitedi dep, sondai kúrdeli shyǵarmany oryndadym», -deidi ol.
Foto: Máýlen Muqataev. "Astana Opera" teatry
«Ár bir ról seniń balań siiaqty»
Odan keiin, Dj. Verdidiń «Trýbadýr» operasynan bir sahna tolyq kórsetildi. Onda kórinis qoiylyp, ariia hormenen birge úlken dýet shyrqady.
«Odan keiingi úlken shyǵarmalar meniń Frantsiiada 7 jyl jumys istegen tájiribemnen alyndy. Onyń da ishinen kontsertte oryndaityn shyǵarmalardy tańdap alý ońaiǵa soqpady. Aqyry tańdap júrip meniń eń kóp oryndaǵan tanymal partiialarymnyń biri Sharl Gýnonyń «Faýst» operasyn oryndaýdy sheshtim. Árine 50 shaqty operanyń barlyǵyn kórsete almaisyń ǵoi. Anaý da meniń súiikti operam, mynaý da meniń súiikti rólderim. Ár bir ról seniń balań siiaqty ǵoi. Balalaryńdy mynany jaqsy kóremin, mynany jaqsy kórmeimin dep bólip-jaryp aita almaisyń ǵoi, sol siiaqty oryndaityn shyǵarmalardy da qimaisyń», -deidi Maira Muhamedqyzy.
Foto: Máýlen Muqataev. "Astana Opera" teatry
Álemdik klassikalardan bólek maestro qazaqtyń halyq áni «Aǵajai Altai» siiaqty ánderi simfoniialyq orkestordyń súiemeldeýimen oryndady.
«Bul án búkil qazaqtyń taǵdyryna jazylǵan án ǵoi. Bizdiń atalarymyzdyń birazy Qytaida qalyp, jartysy bergi bette qalyp qoidy. Al sol atalarymyzdyń búgingi qarlyǵashtary, men tarihi otanyma oraldym. Osy ánmenen tarihi otanymda meni otandastarym qabyldady, jaqsy qarsy aldy, osy án kópshiliktiń júreginen oryn aldy», - deidi opera ánshisi.
Maira Muhamedqyzy kóptegen baiqaýlarǵa qatysyp, júldeli oryndar alǵany da belgili. Kontsertte ol baiqaýlarda oryndaǵan partiialardan úzindi romanstar shyrqady.
«Tyńdarmandarymnyń qýanyshynan asqan baqyt joq»
«Onyń ishinde Portýgaliiada alǵan birinshi oryn, sosyn mýzykanttardyń arasynda Chaikovskii baiqaýy ollimpiada siiaqty 4 jylda bir ótetin óte bedeldi baiqaý. Men sol baiqaýda qazaq ánshileriniń arasynda alǵashqy laýreatymyn», - deidi ol.
Foto: Máýlen Muqataev. "Astana Opera" teatry
Kontsert T. Jarmuqamettiń «Domalaq Ana» operasynan kórinispen aiaqtaldy. Bul qoiylymda Shymkenttik ónerpazdardan quralǵan 60 adamnan turatyn hor aityldy.
«Men úshin tyńdarmandarymnyń júrekteri sál de bolsa silkinip, kontsertten áser alyp, qýanyp qaitsa, sodan asqan baqyt joq», -dep otyr maestro.
Ánshiniń kontserti ótetini týraly jarnama shyqqannan bastap, elimizdiń túkpir-túkpirinen kontsert qoiýǵa shaqyryp jatqandar bar kórinedi. Maira Muhamedqyzy demeýshiler tabylsa Qazaqstandy aralap kontsert qoiǵysy keletinin de aitty.
Daiyndaǵan: Baljan Jeńisqyzy
