Bokstan álem chempiony atanǵan Sáken Bibosynovtyń jeke bapkeri Myrzaǵali Aitjanov shákirtiniń dúbirli dodaǵa qalai daiyndalǵanyn aityp, suhbat berdi, dep jazady Olympic.kz.
«Olimpiadadan keiin qaitadan shyńǵa shyǵý óte qiyn. Tokio oiyndarynan keiin eki apta demalyp, qaitadan jattyǵýǵa kiriskenbiz. Sol kezde Sákennen qaitalap suradym. «Múmkin, qatyspai-aq qoiarsyń, demalarsyń» degen oi boldy.
Biraq ol óz oiynan ainymai, Olimpiadada ketken esesin qaitaratynyn aitty. Mineki, tynymsyz daiyndalǵan Sáken sózinde turdy, álem chempiony atandy. Munyń bári eńbekpen keldi. «Eńbek bárin jeńbek» degen sózdiń durystyǵyn dáleldedi», - deidi Myrzaǵali Aitjanov.
Belgradtaǵy álem chempionatynda Sáken Bibosynov 51 kelige deiingi salmaqta top jardy. Finalda ol amerikalyq Rosko Hildan basym tústi.
