Arys oqiǵasy, Sardoba sý qoimasynyń álegi men pandemiia saldary... Osynaý qiyn jaǵdailarda áleýmettik jelide jalǵan aqparattar jeldei esip, qoǵamda birshama dúrbeleń týdyrǵany belgili.
Osyndai jaǵdaida Túrkistan oblysynyń aqparat salasyna jaýapty mamandar jalǵan aqparattar legin qanshalyqty eńsere aldy? Osy máselege bailanysty Túrkistan oblysy ákiminiń orynbasary Sáken Qalqamanov pikirimen bólisti, dep habarlaidy QazAqparat.
«Pandemiia kezinde halyqpen bailanys jasaýdyń mynadai tásilin tańdap aldyq. Iaǵni, jalǵan aqparattarǵa mán bermei, jarty saǵat saiyn aqparat taratyp otyrdyq. Aqparat taratqanda kommýnikatsiianyń barlyq arnasyn, dástúrli BAQ-tan, áleýmettik jelilerden bastap ártúrli platformalarǵa deiin paidalandyq. Jeke ózim Facebook paraqsham arqyly tikelei efirge shyǵyp, suraqtarǵa jaýap berip otyrdym», - dedi Sáken Qalqamanov Astana Media Week 2020 sharasynyń «Pandemiia jáne BAQ-qa senim daǵdarysy» plenarlyq sessiiasynda.
Túrkistan oblysynda sonymen qatar jarty kún saiyn baspasóz máslihatyn kezek-kezek ótkizgen sarapshylar pýly jasaqtalǵan.
«Odan bólek halyqtyń júreginen oryn tapqan shynaiy jaǵdailardy aqparat retinde kóbirek taratýǵa tyrystyq. Máselen mekteptegi órtti sóndirip bolyp, qatty sharshap sol mańda uiyqtap ketken órt sóndirýshi týraly material (Arystaǵy oqiǵa) halyqtyń súiispenshiligin týdyrdy. Osynaý jaǵdailar bilikke, tótenshe jaǵdailardyń saldaryn joiýǵa atsalysqan adamdarǵa degen senimdi nyǵaita tústi. Osylaisha sarapshylar rastaǵandai maqsatty topqa aqparat jetkizý mindetin jónimen atqardyq degen oidamyn», - dedi ol.
Sáken Qalqamanov sondai-aq pandemiia kezinde de aqparattyq salaǵa basa nazar aýdarylǵanyn jetkizdi.
«Pandemiiamen qatar osy jyly Ózbekstanda sý qoimasy jarylyp, Maqtaral aýdanynyń biraz bóligin shaiyp ketkenin bilesizder. Bul – bizdiń oblystyń halyq eń tyǵyz ornalasqan aýdany. Taǵy bir daǵdaryspen kúreste de jalǵan aqparattar kóp tarap ketti. Oǵan qarsy da aqparattyq saiasatty kúsheittik. Baǵymyzǵa orai mamandarymyz osy syndardan ysylyp qaldy. Kún saiyn órt sóndiretin tótenshe jaǵdailar qyzmetiniń ókilderi sekildi bizdiń oblysta aqparattyq salada biregei kommýnikatsiiany qalyptastyrdyq degen oidamyn. Bul tájiribemen bólisýge daiynbyz», - dedi ol.
Aita ketsek eloradada Astana Media Week 2020 sharasy ótip jatyr. Is-sharanyń negizgi maqsaty – otandyq mediasalany damytý men indýstriiadaǵy iskerlik qarym-qatynasty aimaqtyq jáne halyqaralyq deńgeide ilgeriletý. Mediaaptalyq tórtinshi jyl qatarynan álemniń túkpir-túkpirinen jetekshi sarapshylardy dástúrli túrde jinap keledi jáne ózekti taqyryptar talqylanady.
