Úkimettiń is-áreketteri halyqqa túsinikti, ashyq, qadamdary azamattarmen tyǵyz bailanysta bolýy shart. Bul týraly Májilistiń jalpy otyrysynda depýtat Erlan Sairov málim etti, dep habarlaidy QazAqparat.
«Keshe Úkimettiń keńeitilgen otyrysynda Memleket basshysy Qasym-Jomart Toqaev elimizdegi kedeishilik máselesine basa nazar aýdardy. Prezident Úkimet múshelerine azamattarymyzdyń kópshiliginiń áleýmettik jaǵdaiyn arttyrý baǵytynda jedel qadam jasaýǵa tapsyrma berdi. Elimizdiń tarihynda halqymyzdyń áleýmettik jupyny jaǵdaiy Memleket basshysy deńgeiinde birinshi ret kóterilip otyr. Iaǵni, Prezident Qasym-Jomart Toqaev qoǵamdy, azamattardy, halyqty tolǵandyratyn másele boiynsha ashyq, shynaiy áńgimege shaqyryp otyr degen sóz. Rasynda, halqymyzdyń basym kópshiliginiń áleýmettik jaǵdaiynyń tómendigi elimizdiń turaqty damýyna negizgi tejegish bolyp sanalady», - dedi Sairov Úkimet basshysy Álihan Smaiylovtyń atyna joldaǵan saýalynda.
Osy oraida ol Memleket basshysy 11 qańtarda Parlamentte sóilegen sózinde de Úkimetke halqymyzdyń áleýmettik jaǵdaiyn jaqsartý, azamattardyń ál-aýqatyn jetildirý jóninde naqty tapsyrmalar bergenin eske saldy.
«Bir ai ótti, Úkimet óz deńgeiinde eńbektenip jatqan bolar, degenmen Úkimettiń is-áreketteri halyqqa túsinikti, ashyq, qadamdary azamattarmen tyǵyz bailanysta bolýy shart. Aldyńǵy Úkimettiń basty problemasy ózderiniń is - qadamdarynyń logikasyn, baǵyt-baǵdaryn elge, qoǵamǵa túsindire almady, jabyq stilde jumys istedi. Tarihtan sabaq alatyn ýaqyt jetti. Osy oraida, Álihan Ashanuly ózińizdiń, Úkimet músheleriniń Májiliske, qoǵam ókilderiniń qatysýymen, Prezident bergen kelesi tapsyrmalar: kedeishilikpen kúres, jastar máselesi, kishi jáne orta biznesti damytý, syrtqa zańsyz ketken kapitaldy qaitarý problematikasy, «Samruq Qazynany» reformalaý, ROP-ty ońtailandyrý máseleleri boiynsha esep bergenderińiz abzal», - dedi depýtat.
«Halyq, qoǵam Prezident tapsyrmalarynyń qalai oryndalyp jatqandyǵy, qandai jospar bar, tapsyrmany oryndaýda qandai qiyndyqtar bar ekendigi jóninde ashyq, búkpesiz habardar bolýy qajet. «Jańa Qazaqstan» filosofiiasy ashyq dialogty, shynaiy diskýssiiany talap etedi! Halyqtyń máselesi tynysh kabinet sheńberinde emes, qoǵammen birlesip talqylanyp, sheshilýi tiis», - dedi Erlan Sairov.
