© Sputnik / Ramil Sitdikov
Atyraý oblysy Qyzylqoǵa aýdany Saǵyz aýylynda bolǵan jappai tóbeleske qatysqandarǵa sot úkimi shyqty, dep habarlaidy Sputnik Qazaqstan saity "Moi gorod" portalyna silteme jasap.
Oqiǵa 2021 jyly 30 qazanda bolǵan. Sot úkimi shyqqan úsh adam kisi óltirgeni jáne kisi óltirýge oqtalǵany úshin, bireýi densaýlyqqa qasaqana ziian keltirgeni úshin, 10 adam qylmysty bile turyp jasyrǵany úshin, al bir adam jasyrynyp qalǵany úshin aiyptaldy. Qylmystyq isti alqabiler qarady.
"Tóbeles kezinde sottalýshylardyń biri pyshaqpen jábirlenýshini iyq tusynan jaraqattaǵan, sosyn eki adamnyń keýde tusynan pyshaqtaǵan. Basqa sottalýshy taǵy bir jábirlenýshiniń basynan qubyrmen soqqan. Osy kezde kóliktiń janynda turyp, ne bolyp jatqanyn baqylap otyrǵan jas jigit ańshy myltyǵynan aspanǵa birneshe ret oq atady Ári qarai sottalýshy ańshylyq qarýyn kópshilikke qarai kózdep, er adamǵa eki ret oq atqan", — dep habarlady sottyń baspasóz qyzmeti.
Kúdiktiler oqiǵa ornynan qashyp ketken. Jappai tóbeles saldarynan bir adam qaitys bolyp, 6 adam aýyr jaralanǵan. Jábirlenýshi tarap sottalýshylarǵa eń aýyr jaza taǵaiyndaýdy surady.
Sottalǵandardyń biri 16 jylǵa, ekinshisi 11 jyl, al úshinshisi bes jylǵa sottaldy. Sondai-aq 6 adam 4 jylǵa bas bostandyǵynan airyldy. Taǵy bir aiypty ortasha aýyrlyqtaǵy densaýlyqqa qasaqana ziian keltirgeni úshin kináli dep tanyldy, biraq raqymshylyq jasaldy. Alqabiler kinási dáleldenbegen 11 adamdy aqtady. Sot úkimi zańdy kúshine engen joq.
