6 qańtarda Almaty ákimi Baqytjan Saǵyntaevtyń kortejine shabýyl jasaldy. Oqiǵanyń mán-jaiyn "Almaty" telearnasynyń bas direktory Nurjan Jalaýqyzy aityp berdi. Shabýyl kezinde telearna qyzetkerleriniń biri qaza boldy, - dep habarlaidy Tengrinews.kz tilshisi.
"Júrgizýshimiz Murathan Bazarbaev qyzmettik mindetin atqarý kezinde qaza boldy. Arnaiy tehnika operatory Diasken Baitibaev jaralandy. Onyń oń qolyna oq tigen, eki saýsaǵynan aiyryldy. Úshinshi qyzmetker - operator Arsen Sandybaev aman-esen", - dedi Nurjan Jalaýqyzy.
Qaza bolǵan júrgizýshiniń aiaǵy men ishine oq tigen.
"Qazir Diasken aýrýhanada, oǵan barynsha qoldaý kórsetip jatyrmyz. Olardyń otbasyna qajetti kómek kórsetiledi. Bul tipti talqylanbaidy da", - dedi Jalaýqyzy.
"Almaty" telearnasynyń direktory túsirilim tobyna qalai shabýyl jasalǵanyn aityp berdi.
"Olar 6 qańtarda, keshke Respýblika alańyna shyqty. Ásker alańdy baqylaýǵa alǵany aityldy. Murathan aǵa keńsege jaqyn mańda turatyn, bári sol kisiniń kóligine otyryp shyqqan. Ál-Farabi dańǵylynan Fýrmanovqa (Nazarbaev - esk.) burylǵanda olarǵa oq jaýdyrǵan", - dedi Jalaýqyzy.
Ol túsirilim toby qala ákimi Baqytjan Saǵyntaevtyń korteji quramynda bolǵanyn rastady.
"Áriptesimiz Murathan Bazarbaevtyń otbasyna jáne jaqyndaryna qaiǵyra kóńil aitamyz. Onyń batyldyǵy, jumysyna berilgendigi jáne qyzmeti máńgi jadymyzda", - dedi Nurjan Jalaýqyzy.
Buǵan deiin Almaty ákimi Baqytjan Saǵyntaevqa shabýyl jasalǵany habarlanǵan bolatyn.
