Memleket basshysynyń tapsyrmasymen QR Premer-ministri Baqytjan Saǵyntaev jumys saparymen Jambyl oblysyna bardy, habarlaidy "Ult aqparat".
Onda ol óńirde memlekettik baǵdarlamalardyń jáne «Qazaqstannyń úshinshi jańǵyrýy: jahandyq básekege qabilettilik» Joldaýy mindetteriniń iske asyrylý barysymen tanysady, sondai-aq, AÓK damytý máseleleri jóninde jeke keńes ótkizip, óńirlik kásipkerlermen kezdesedi dep kútilýde.
Baqytjan Saǵyntaev Tarazǵa kelgen boida óńirdiń birqatar áleýmettik nysandaryn aralady.
Premer-ministr «Arai» shaǵyn aýdanynyń kópqabatty turǵyn úileriniń qurylysy mysalynda óńirde «Nurly jer» turǵyn úi qurylysy baǵdarlamasynyń iske asyrylý barysymen tanysty. Jambyl oblysy ákiminiń orynbasary Ǵalymjan Ábdiraiymov qurylystyń qazirgi jaǵdaiy men keleshegi týraly baiandady.
Biyl oblysta «Nurly jer» baǵdarlamasy boiynsha 17,7 myń m2-qa 258-den astam páterdi paidalanýǵa berý boiynsha tórt joba iske asyrylyp jatyr, sonymen qatar JTQ boiynsha 922 jer telimi bólingen. 2018 jyly 13 kópqabatty úi qurylysyn aiaqtaý nemese 1 070 páterdi paidalanýǵa berý kózdelgen.
Jalpy osy jyldyń 10 aiynda Qazaqstanda qurylys qarqynynyń kórsetkishteri 2016 jyldyń osy kezeńimen salystyrǵanda 1,8%-ǵa jaqsarǵan. Barlyǵy 8,8 mln m2 turǵyn úi paidalanýǵa berilgen.
Sondai-aq, Premer-ministrge oblysta sportty damytý keleshegi týraly baiandaldy. Baqytjan Saǵyntaev 2 myńnan astam sportshy kún saiyn sporttyń túrli kúsh qoldanylatyn túrleri: grek–rim kúresimen, kikboksingpen, taekvondomen, armrestlingpen jáne t. b. ainalysatyn «Atletik» olimpiada rezervin daiyndaityn oqytý-jattyǵý keshenine bardy.
Jambyl oblysynda barlyǵy 46 sport mekemesi bar, 22 myńǵa jýyq sportshy júieli túrde túrli sport túrlerimen ainalysady, olardyń 14 myńy — aýyldyq sport mektepterinde jattyǵady. Búgingi tańda óńir sportshylary resmi halyqaralyq jáne respýblikalyq jarystarda 1 387 medal ielengen, olardyń 577-si — altyn.
Aita keteiik, QR Premer-ministri buǵan deiin jumys saparlary aiasynda Batys Qazaqstan, Aqtóbe, Shyǵys Qazaqstan, Qyzylorda, Almaty, Pavlodar, Soltústik Qazaqstan, Qostanai, Qaraǵandy, Aqmola, Atyraý, Ońtústik Qazaqstan, Mańǵystaý oblystarynda jáne Astana, Almaty qalalarynda bolyp qaitty.
