Alataý aýdanyna jumys sapary kezinde Almaty ákimi Baqytjan Saǵyntaev «Zerdeli» yqshamaýdany turǵyndarymen kezdesti, dep habarlaidy "Ult aqparat".
Ákim úilerdi tekserý ári nyǵaitý boiynsha júrgizilip jatqan jumystar týraly aityp berdi.
Qala ákiminiń baspasóz hatshysy Áset Muqajanov habarlaǵandai, Almaty ákimi turǵyndardy barlyq úilerdiń tekseriletinine, qajet bolǵan jaǵdaida nyǵaitylatyndyǵyna sendirdi.
«Qarjy bólindi, jumys júrip jatyr», - dedi ákim.
Sonymen qatar, Baqytjan Saǵyntaev jóndeý jumystaryna jáne yqshamaýdan aýmaǵyn abattandyrýǵa qatysty qoiylǵan suraqtarǵa jaýap berdi. Alataý aýdanynyń ákimi Azamat Qaldybekovke tiisti tapsyrmalar berildi.
2016 jyly 6 úidiń irgetasy nyǵaitylǵan bolatyn (1/136, 1/148, 1/170, 1/153, 1/156, 1/158). Kúsheitý jáne tegisteý jumystary kepildik mindettemeleri aiasynda merdigerlerdiń qarjysy esebinen júrgizildi. Biyl ákimdiktiń tapsyrmasy boiynsha «QazQSǴZI» AQ mamandary qalǵan 24 turǵyn úidiń irgetastary men tireýish qurylymdaryna saraptama júrgizgen edi.
Búginde 7 úidi nyǵaitý týraly qorytyndy jasaldy. Onyń ishinde 4 úidiń irgetastaryn nyǵaitý (1/160, 1/161, 1/179, 1/180) jumystary aiaqtaldy. Qazirgi kezde 3 úi (1/165, 1/167, 1/168) nyǵaitylyp jatyr. Qalǵan 17 úige saraptama júrgizilip jatyr. Tekserý 2020 jyldyń jeltoqsan aiynda aiaqtalady. Qorytyndy alynǵannan keiin, qajet bolǵan jaǵdaida nyǵaitý jumystary júzege asyrylady.
«Zerdeli yqshamaýdanynda 30 kóppáterli 9 qabatty turǵyn úi 2012-2016 jyldary salynǵan bolatyn.
