“Qazirgi ýaqytta BAQ-tarda qylmystar týraly kóp aitylyp jatyr. Qylmyskerlerdiń Almaty oblysynda ustalǵany belgili boldy, tergeý sharalary júrip jatyr. Bul halyqty alańdatyp otyrǵandyqtan, bul jaiynda bizge málimet berseńiz” dedi Úkimet basshysy Saǵyntaev Ishki ister ministri Qalmuhanbet Qasymovqa. Bul týraly "Egemen qazaqstan" jazdy.
“20 qyrkúiekte bizge úsh azamattyń Almatyǵa mal satýǵa ketip, joǵalyp ketkeni jaily habar kelip tústi. 21 qyrkúiekte olardyń bir kóligin taptyq. Olar eki kólikpen 41 bas iri qarany Almaty oblysyndaǵy bazarǵa satýǵa apara jatqan. 23 qyrkúiekte ekinshi kólik tabyldy” dedi Qalmuhanbet Qasymov.
“Osydan keiin jergilikti turǵyndardyń bul kóliktiń júrgizýshilerine kómekteskeni belgili boldy, sóitse olar lai-batpaqta turyp qalypty, keiin ol jerde kim bolǵany belgili boldy. Olar Jambyl aýdanynyń turǵyndary. Osy tulǵalar arqyly qylmyskerlerdi anyqtadyq, Jambyl aýdanynyń eki turǵynyn anyqtadyq, olar mal bazarǵa bara jatyp, osy satýshylarǵa jaqyndaǵan. Sóitip, olardan barlyq malyn satyp alýdy usynǵan. Olardy aldap, alqapqa alyp ketip, qylmys jasaǵan. Máiitter men maldy jetkizý barysynda olardyń kóligi toqtap qalǵan, sondyqtan olar jergilikti turǵyndardan kómek suraǵan. Qazirgi ýaqytta qylmyskerler ustaldy, kisi óltirýge qoldanylǵan qarý tárkilendi, qylmyskerler máiitterdi qaida kómip ketkenin óz qalaýymen kórsetip berdi. Qajetti saraptamalar taǵaiyndaldy. Búgin jerleý rásimi ótedi. 36 bas iri qara tárkilendi. Isti Almaty oblystyq IID tergep jatyr. Menińshe, az ýaqyttyń ishinde isti tergep, sotqa joldaimyz” Ishki ister ministri.
“Baqylaýǵa alyńyzdar. Qoǵamdyq qaýipsizdiktiń jáne zorlyqpen kúrestiń bizdiń negizgi jumysymyz ekenin barlyǵymyz bilemiz. Sondyqtan taiaý arada osy máseleni úkimette qaraimyz dep oilaimyn”, – dedi Saǵyntaev.
Taldyqorǵan qalasyna jaqyn mańdaǵy Kóksý aýdanynyń 3 turǵyny Almaty jaqtaǵy Uzynaǵash bazarynda mal satýǵa ketip sol kúii joǵalyp ketken bolatyn.
Keiinirek olardyń máiitteri tabyldy. Vedomstvodaǵylardyń aitýynsha, marqumdardyń denesinde zorlyq belgiler bar. Politseiler kisi óltirdi degen kúdiktilerdi ustapty. Olar Jambyl aýdanynyń eki turǵyny. Qazirgi ýaqytta QR Qylmystyq kodeksiniń 99-baby (“Adam óltirý”) boiynsha sotaldy tergeý bastalypty. Kúdiktiler ýaqytsha ustaý izoliatoryna qamaldy.
