Búgingi Úkimet otyrysynda eldegi jergilikti politsiia jumysy qaralyp, Premer-ministr Baqytjan Saǵyntaev saladaǵy jumystardyń tiisti túrde atqarylmai kele jatqanyn synady. Úkimet basshysy Almaty qalasy boiynsha qalta telefondarynyń urlyǵy óte kóp ekenin, quqyq qorǵaý organdary onyń aldyn alý boiynsha jumystar atqarmai otyrǵanyn synady, dep habarlaidy Baq.kz tilshisi.
«Respýblikada oryn alǵan qylmystardyń 20% jýyǵy Almaty qalasynyń úlesinde. Halyq sany da kóp. Degenmen, óte úlken kórsetkish. Bul qýanatyn jaǵdai emes. Tómendetý kerek», - dedi joldaǵan Premer-ministr.
Saǵyntaev Almaty qalasy Ishki ister departamenti basshysynyń orynbasary Nurlan Másimovten ońtústik elordada uialy telefon urlyǵy joǵary bolýyna qatysty túsinikteme berýdi talap etti.
«Uialy telefon boiynsha árbir qylmys tirkelip jatyr. Kóbisinde, iaǵni, uialy telefondar urlyǵynyń 70% jaǵdaiynda azamattar telefondaryn qaldyryp ketedi. Iaǵni, urlyq bolmaidy, telefondaryn ózderi qaldyryp ketedi, bir-eki kúnnen soń kelip aryz jazady, naqty uryny kórsete almaidy», - dedi oblystyq IID ókili.
Úkimet basshysy urlyqqa qatysty qylmystyń árbir besinshisi uialy telefon urlyǵyna qatysty oryn alyp otyrǵanyn eske saldy.
«Sonda bárine telefondaryn tastap ketken búkil halyq kináli ǵoi. Eshkim urlap otyrǵan joq, ózderi tastap ketip júrgen. Sizdiń oiyńyzsha, endi telefondarymyzdy shynjyrmen bailap, qaltaǵa salyp júrý kerekpiz ǵoi. Ótkende avtokólik bólshekteriniń urlyǵy boiynsha kóp aityldy. Olardyń barlyǵyn satatyn oryndary bar dedińizder, tamyz aiynyń basynda shýyldatyp biraz reidter jasadyńyzdar. Týra sol siiaqty, myna urlanǵan uialy telefondardy satatyn oryndar kóp. Osyǵan qatysty ne jasap otyrsyzdar?», - dep vedomstvo ókiliniń keltirgen dáiektemesine kóńili tolmaǵan Baqytjan Saǵyntaev.
Nurlan Másimov uialy telefon satatyn oryndardyń kóbi saýda úilerinde ornalasqanyn aita kele, qazirgi ýaqytta ol oryndardan urlanǵan uialy telefondar tárkilenip, satýshylarmen, saýda oryndarynyń ielerimen túsindirý jumystary júrgizilip jatqanyn málimdedi.
