Memleket basshysymen telefon arqyly sóilesý barysynda Baqytjan Saǵyntaev Almatydaǵy qazirgi sanitarlyq-epidemiologiialyq jaǵdai, koronavirýs indetiniń taralýyna jol bermeý, sondai-aq karantin rejimin qamtamasyz etý jáne áleýmettik kómekke muqtaj turǵyndarǵa qoldaý kórsetý maqsatynda qabyldanyp jatqan sharalar týraly baiandady, dep habarlaidy "Ult aqparat".
«Qazirgi tańda infektsiianyń jasyryn oshaqtaryn anyqtaý úshin indet juqtyrýy múmkin degen barlyq táýekel top ókilderin jappai testileýdi jalǵastyrýdamyz. PTsR ádisimen 26 myńǵa jýyq adam tekserýden ótti, taǵy 21 myńy jedel-testileýden ótkizildi. Osyndai jedel qolǵa alynǵan sharalardyń nátijesinde meditsina qyzmetkerleri men áskeri qyzmetshilerdiń jekelegen toptary arasynda qaterli virýsty juqtyrý oshaqtary anyqtalýda. Olardyń bári dereý oqshaýlanyp, infektsiianyń odan ári taralyp ketpeýi úshin tiisti sanitarlyq-epidemiologiialyq sharalar qabyldanýda», – dep atap ótti B.Saǵyntaev.
Sonymen qatar, ol qalanyń infektsiiadan taza aýmaǵyn qorǵaý maqsatynda indet anyqtalyp jatqan toptaǵy adamdar bólek oryndarǵa arnaiy bólingen tasymaldaý kólikterimen jetkiziletinin atap ótti.
Qazaqstan Prezidentiniń tapsyrmasyna sáikes megapolistiń ekonomikalyq belsendiligin kezeń-kezeńimen jańǵyrtý strategiiasy ázirlendi. Ol úshin qalanyń ekonomikasyna qan júgirtip, qaita qalpyna keltirý úshin áleýeti joǵary kásiporyndar, sondai-aq koronavirýs infektsiiasyn taratý qaýpi tómen dep tanylǵan sektorlar anyqtaldy.
«Biznes ókilderi úshin boryshkerlik jáne qarjylyq qiyndyqtardy azaitý boiynsha júieli sharalar qabyldanýda. EDB-men birlesip biznes sýbektileriniń qaryzdary boiynsha tótenshe jaǵdai kezinde tólemderdi keiinge qaldyrýdy jedeldetý máselesi pysyqtaldy. Budan basqa qala ekonomikasyn qalpyna keltirý úshin daǵdarysqa qarsy jospar ázirlenýde.Jumyspen qamtýdyń jol kartasy» baǵdarlamasy boiynsha jobalardy iske asyrý kezinde shamamen 26 myń jumys orny qurylady. Qoldanystaǵy baǵdarlamalardy, atap aitqanda, «Almaty Biznes – 2025» jáne iri investitsiialyq jobalardy iske asyrý jalǵasady. Al bul óz kezeginde taǵy 15 myńǵa jýyq jańa jumys ornyn qurýǵa múmkindik beredi»,- delingen ákimdik habarlamasynda.
Memleket Basshysynyń tapsyrmalaryn oryndaý maqsatymen tótenshe jaǵdai kezinde halyqtyń áleýmettik osal toptaryn jáne qala turǵyndaryn qoldaý úshin keshendi sharalar iske asyrylýda.
Muqtaj jandardyń biryńǵai tizimin qalyptastyrý úshin ótinishter qabyldaityn koll-ortalyq quryldy. Demeýshilerdiń qarajaty esebinen azyq-túlik sebetin jetkizý, 2 AEK kóleminde áleýmettik tólemder, «Birgemiz» qorynan 50 myń teńge mólsherindegi qaiyrymdylyq kómek kórsetildi. Soǵys ardagerleri men múgedekterine 1 mln teńge, olarǵa teńestirilgen tulǵalarǵa 100 myń teńge jáne eńbek maidanyna qatysýshylarǵa 50 myń teńge mólsherinde birjolǵy áleýmettik kómek túrleri uiymdastyryldy.
Azyq-túlik jiyntyǵymen 10 243 muqtaj otbasy qamtamasyz etildi. Al 2 AEK mólsherindegi áleýmettik kómekpen 68,2 myń adam qamtyldy. Búgingi kúni 44,2 myń adamǵa 246,2 mln teńgege kómek kórsetilgen. Sonymen qatar, resmi túrde jumyssyz retinde tirkelgen III toptaǵy 17,2 myń múgedek jan 95,8 mln teńgege kómek aldy.
Tótenshe jaǵdaiǵa orai tabysynan aiyrylǵan azamattarǵa tiesili 42500 teńge eń tómengi jalaqy mólsheri (1 ETJ) 333 215 turǵynǵa 14,2 mlrd. teńge somasynda taǵaiyndalyp, aýdaryldy.
Telefon arqyly sóilesý barysynda Qazaqstan Prezidenti Qasym-Jomart Toqaev qyzmetin qaita bastaityn kásiporyn qyzmetkerleriniń sanitarlyq qaýipsizdigin qamtamasyz etýdi tapsyrdy. Sonymen qatar, qala ákimdigi muqtajdarǵa áleýmettik kómek kórsetý sharalaryn iske asyrý jáne koronavirýstyq infektsiianyń taralýyna jol bermeý úshin sanitarlyq-epidemiologiialyq jaǵdaidy turaqtandyrý jónindegi jumysty jalǵastyrýy qajet.
