Úkimettiń búgingi otyrysynda tutynýshylar quqyqtaryn qorǵaý máselesi qaraldy, dep xabarlaidy QazAqparat tilshisi.
Negizgi baiandamalardan keiin Baqytjan Saǵyntaev memlekettik organdardyń basshylaryna eskertý jasady.
«Negizi, búgingi bizdiń otyrysymyzǵa tutynýshylardyń quqyqtaryn qorǵaý salasyndaǵy uiymdardyń ókilderin shaqyrý kerek edi. Atqarylyp jatqan sharalardy ózimiz ǵana talqylap qoimai, olardy da tyńdap shyqqan durys», - dedi B.Saǵyntaev.
Premer-Ministriniń aitýynsha, osy salada tiisti sharalar atqarylsa da, quqyqbuzýshylyq faktileri azaiatyn emes.
«Jańa ózińiz aityp otyrsyz ǵoi, bizdiń tarapymyzdan qajetti sharalar qolǵa alynǵanmen keibir saýda oryndary men basqa da mekemeler standartqa sai kelmeitin azyq-túlikti jáne basqa da ónimderdi satyp jatyr. Bálkim, Taldyqorǵannyń tájiribesin keńinen taratamyz? Ol jaqta bireý sapasyz taýardy satyp, zańdy buzsa, onda ǵimarattyń shekesine «Senbeimiz!» degen úlken bilbordty ilip qoiady. Týra solai zańdy jii buzatyn saýda úileri men kompaniialar jaiynda ashyq aitý qajet. Olarǵa «Senbeimiz!» degen aidar taǵý qajet. Menińshe, xalyq ol bastamany qoldaidy. Biz óz tarapymyzdan qansha jumys atqarsaq ta, biznestiń betburysy ózgermese, osy qalpynda qala beremiz», - dep atap kórsetti B.Saǵyntaev.
