Úkimet otyrysynda sý tasqynynan zardap shegip otyrǵan Shyǵys Qazaqstan oblysynyń ákimi Danial Ahmetov aimaqtaǵy ahýal jaily baiandady, dep habarlaidy Baq.kz tilshisi.
Premer-ministr Baqytjan Saǵyntaev óńirdegi jaǵdai men zardap shekken aýdandardaǵy turǵyndarǵa kómek qalai kórsetilip jatqanyn surady.
«Qazirgi kúni oblystyń tórt aýdany - Aiagóz, Zyrian, Glýbokoe, Shemonaiha men Semei qalasynda tabiǵi sipattaǵy tótenshe jaǵdai jariialandy. Barlyq másele meniń turaqty baqylaýymda. Sý basqan jerlerde tehnika men qural-jabdyqtar jumys istep jatyr. Arnaiy qurylǵan komissiia shyǵyndy esepteýde. Qoǵam ókilderine qosymsha 3 107 adam qamtyldy. Qazirgi kezde úilerdi qalpyna keltirý, jóndeý boiynsha jumys bastalyp ketti. Osyndai kúndelikti jumysty biz atqaryp júrmiz. Mundai másele birinshi ret bolyp otyr. Mysaly, Zyrian qalasynda 60 jyl osyndai jaǵdai bolmaǵan. Endi Buqtyrma ózeninde muzdyń qalyńdyǵy 2 metr boldy. Qazir jarý jumystaryn ótkizip jatyrmyz. Biraq ta búginde kún buzyldy. Óskemende de, Zyrian jaqta da qar jaýyp jatyr. Barlyq jumysty baqylaýdamyz», - dedi Danial Ahmetov.
Baqytjan Saǵyntaev Úkimet tarapynan qajetti kómektiń barlyǵy kórsetiletinin aitty.
«Danial Kenjetaiuly, sizdiń jazǵan hatyńyz kelip tústi. Qosymsha qarajat kózi kómek retinde bólinedi. 2 mlrd teńge oblysqa suraldy. Baqyt Turlyhanuly (Sultanov - qarjy ministri - avt.), sheshimderdi shuǵyl túrde daiyndańyz. Asqar Uzaqbaiuly (Mamin - premer-ministr orynbasary - avt.), jalpy respýblika boiynsha osy kúrdeli jaǵdaidyń barlyǵy sizdiń baqylaýyńyzda», - dep tapsyrdy premer-ministr.
