Úkimettiń búgingi otyrysynda Shýda apatqa ushyraǵan jolaýshylar poiyzyna qatysty oqiǵa qaraldy, dep xabarlaidy QazAqparat tilshisi.
QR Ishki ister ministri Qalmuxambet Qasymovtyń aitýynsha, oqiǵa ornyna Astanadan arnaiy tergeý toby jiberildi. «Bul fakti boiynsha biz qylmystyq is qozǵadyq. Arnaiy tergeý toby kýágerlerlen jaýap alyp jatyr. Tiisti saraptamalar taǵaiyndaldy. Barlyq tergeý sharalary Ishki ister ministrligi men Bas prokýratýranyń baqylaýynda», - deidi Q.Qasymov
Al QR Densaýlyq saqtaý ministri Eljan Birtanovtyń sózine qaraǵanda, jolaýshylar poiyzynyń apaty kezinde 25 adam túrli jaraqat alǵan. Bir jasóspirim kóz jumdy. «Jedel járdem brigadasy barǵanǵa deiin bala oqiǵa ornynda qaitys boldy. Saraptamanyń aldyn ala qorytyndysy - jabyq bas súiek mi jaraqaty. Miǵa qan quiylyp, isik paida bolǵan. Meditsinalyq kómekke Jambyl oblysynda 17 jáne Almaty oblysynda 8, jalpy 25 adam júgingen. 24 naýqasqa meditsinalyq kómek kórsetilgennen keiin úilerine jiberildi. Bir azamatqa oń aiaǵyndaǵy tobyǵy jabyq túrde syndy degen diagnozben ota jasalyp, ol Shý qalalyq aýrýxanasyna jatqyzyldy», - dep atap kórsetti E.Birtanov.
QR Premer-Ministri Baqytjan Saǵyntaev jolaýshylar poiyzynyń apatyna qatysty kóńil aityp, birqatar tapsyrmalar berdi. «Qazaqstan temirjoly» kompaniiasy Qaraǵandy oblystyq ákimdigimen birlese otyryp, qaza bolǵan balanyń otbasyna qajetti kómek pen qoldaý kórsetsin. Densaýlyq saqtaý ministrligi zardap shekkenderge sapaly meditsinalyq kómek berýdi qamtamasyz etsin jáne baqylaýǵa alsyn. Ishki ister ministrligi, Investitsiialar jáne damý ministrligi men «Qazaqstan temirjoly» kompaniiasy basqa múddeli organdarmen birlesip, vagondardyń joldan shyǵyp ketý sebepterin muqiiat teksersin. Bul oqiǵany tekserý barysyn men jeke baqylaýyma alamyn», - dep atap kórsetti B.Saǵyntaev.
Aita keteiik, otyrys barysynda «Qazaqstan temirjoly» ulttyq kompaniiasynyń basshysy Qanat Alpysbaev tekserýdiń aldyn ala nátijesin jariialady.
