Almaty ákimi Baqytjan Saǵyntaev renovatsiia jobalary týraly aitty, dep habarlaidy "Ult aqparat".
Renovatsiia baǵdarlamasy boiynsha qaladaǵy eski úilerdi súrý jolymen «eski» aýmaqtar kesheni jańaryp, turǵyndar jańa úilerge kóshedi.
B. Saǵyntaev Instagram-daǵy paraqshasynda habarlaǵandai, renovatsiia baǵdarlamasy myńdaǵan qala turǵyndarynyń ómir súrý sapasyn jaqsartýǵa jáne qurylys salasyna investitsiia tartýǵa baǵyttalǵan.
«Qalada 1444 eski úi bar. Sonyń 609-y Túrksib aýdanyna tiesili. Munda Almaty ákimdiginiń kúrdeli qurylys kásiporny 62 páterge arnalǵan 5 qabatty eki úi turǵyzdy. Úsh eski úidiń (42 páter) ornyna investorlardyń kúshimen 152 páterlik 7 úi boi kóteredi. Osipenko kóshesinde 59 páterli eki úidiń qurylysy bastalady. Sondai-aq jeke investordyń esebinen 30 eski eki qabatty úidiń ornyna 1252 páterge arnalǵan 26 zamanaýi bes qabatty ǵimarat salý josparlanýda», - dep jazdy Almaty ákimi.
Almaty ákimdiginiń kúrdeli qurylys kásiporny Túrksib aýdanynda renovtsiia jobasyn Saýranbaev — Moldaǵaliev — Chernyshevskii — Tolstoi kósheleri aýmaǵynda iske asyratyn bolady. Jeke investor aýqymdy joba boiynsha jańa úilerdi osydan 60 jyl buryn salynǵan ekiqabatty eski úiler turǵan Seifýllin dańǵyly — Aqan seri — Kassin — Kotelnikov kósheleriniń aýmaǵynda salatyn bolady.
Sonymen qatar, Baqytjan Saǵyntaev Medeý aýdanynda 21 páterge arnalǵan eski úsh úidiń ornynda 303 páterli 6 úidiń qurylysy aiaqtalyp qalǵanyn atap ótti. Jetisý aýdanynda 70 páterli 8 eski úidiń ornyna investorlarmen birge 489 páterli 7 úidiń qurylysyn bastaý josparlanǵan.
