Úkimet basshysy Baqytjan Saǵyntaev Bilim jáne ǵylym ministri Erlan Saǵadievke bilim reformalaryn jasaý kezinde aqparattyq túsindirme jumystaryna mán berýdi tapsyrdy, dep habarlaidy «Ult Aqparat» «QazAqparatqa» silteme jasap.
«Memleket basshysy jaqynda elimizdiń 2025 jylǵa deiingi strategiialyq damý josparyn bekitti. Osy josparda bilim júiesi arqyly adami kapitaldy damytýǵa erekshe kóńil bólinip otyr. Qazir jańa baǵdarlamalar daiyndalýda. Oqýlyqtar ázirlenýde. Muǵalimderdiń jalaqysy ósip keledi. Munyń barlyǵy bilim berý sapasyna yqpal etýi tiis. Degenmen, bilim salasynda atqarylyp jatqan protsesterdiń barlyǵyna qoǵamdyq túsinbeýshilikter bar», - deidi Premer-Ministr Úkimet otyrysynda.
Baqytjan Saǵyntaevtyń aitýynsha, ata-analar, Parlament depýtattary tarapynan bul baǵytta syndar aitylyp jatyr.
«Ony Erlan Kenjeǵaliuly (Bilim jáne ǵylymi ministri - avt.) ózińiz de bilip otyrsyz. Bul jerde atqarylyp jatqan jumystar tóńireginde daý týǵyzyp otyrǵany - reformalardyń sapasy. Jyldan jylǵa qaitalanatyn másele - bul oqýlyqtardyń jetkilikti deńgeide sapaly jasalmaýy nemese jetkizilmeýi. Osyǵan asa kóńil bólý qajet. Buǵan Erlan Kenjeǵaliuly, jeke ózińiz jaýap beresiz. Jáne bizdiń atqaryp jatqan jumystardyń deńgeiindegi muǵalimderdiń jáne qoǵamnyń pikirin eskerýimiz qajet. Eger de biz qoǵamdyq talqylaý jasamaityn bolsaq, únemi osyndai túsinbeýshilikke tap bolamyz. Sondyqtan da aqparattyq túsindirý jumystaryn kúsheitýdi tapsyramyn», - dedi Baqytjan Saǵyntaev.
