Almaty ákimi Baqytjan Saǵyntaev qalalyq Politsiia departamenti men qoǵamdyq keńes múshelerin jinap jiyn ótkizdi, dep habarlaidy "Ult aqparat".
«@dvd_galmaty jáne qoǵamdyq keńespen jiyn ótkizdim. Qylmysqa, kriminalǵa, esirtkige qarsy kúresýdiń, PPQ pen ýchaskelik pýnktterdiń jumysyn jańartýdyń joldaryn belgiledik. Almaty turǵyndar men qonaqtar úshin qaýipsiz qala bolýy tiis. Bul PD jumysyna berilgen baǵa», - dedi qala basshysy óziniń Twitter-degi paraqshasynda.
Onyń aitýynsha, jinalǵandar keleńsiz jaittardy jáne megapoliste qaýipsizdik pen quqyqtyq tártipti kúsheitýdiń aldaǵy sharalaryn talqylaǵan.
«Urlyqqa, buzaqylyqqa, tonaýǵa jáne nashaqorlyqqa qarsy kúresti barynsha kúsheitý qajet. Munda patrýldik politsiianyń jumysyn qaita qarap, videobaqylaý jelisin keńeitken jón. Politsiia departamentine ýchaskelik pýnktterge tekserý júrgizýdi, modernizatsiia boiynsha usynys berýdi tapsyrdym. Politsiia jumysynyń basty kórsetkishi halyqtyń senimi bolýy tiis. Barlyq máseleler meniń jeke baqylaýymda», - dedi ákim.
