Almatyda qala basshysy Baqytjan Saǵyntaev pen Almaty oblysynyń ákimi Amandyq Batalovtyń qatysýymen eki óńirdiń irgeles aimaǵyn damytý máseleleri boiynsha keńes ótti, dep habarlaidy "Ult aqparat".
Almaty ákimdiginiń habarlaýynsha, ákimder megapolis pen oblystyń shekaralas eldimekenderi turǵyndarynyń áleýmettik máselelerin sheshýge baǵyttalǵan is-qimyldy talqylady. Problemanyń negizgi spektri anyqtaldy - turǵyn úi jáne áleýmettik nysandar qurylysy, kólik jáne jol infraqurylymyn nyǵaitý, azyq-túlik qaýipsizdigi jáne týristik áleýetti arttyrý. Kásipkerlikti damytý arqyly jumys oryndaryn qurýǵa basa nazar aýdaryldy.
Almaty ákiminiń orynbasary Muhit Ázirbaevtyń aitýynsha, turǵyn úi salý úshin qalada bos jer joq. Baspanaǵa degen suranys qurylys qarqynynan basym. Úi kezegindegiler sany jyl saiyn 10%, iaǵni 2400 adamǵa artyp otyrady. Máseleni sheshýdiń bir joly - oblys aýmaǵynda 2015 jylǵy tájiribe boiynsha turǵyn úi salý. Ol kezde Almaty qalasynda baspana kezeginde turǵan 900-den astam adam Qarasai aýdanyndaǵy «Asyl Arman» turǵyn úi kesheninen páter alǵan bolatyn.
Kólik qatynasyn damytý úshin B.Saǵyntaevtyń tapsyrmasy boiynsha, qalamańy tasymalymen qalalyq mýnitsipaldy jáne jeke avtoparkter ainalysatyn bolady. Qyzmet kórsetý sapasyn arttyrý maqsatynda tasymaldaý erejesi kúsheitiledi. Bilim basqarmasy tasymaldaýshylarmen jáne kolledjdermen birge júrgizýshiler men servistik qyzmetshiler quramyn oqytý men qaita oqytýdy qolǵa alady. Mindet – jalpy júrgizýshilik mádenietti arttyrý.
Aita keterligi, kólik ótkizý qabiletin arttyrý úshin qalada jolaiyryqtar salynyp, úńgileý jumystary júrýde. «Altyn-Orda» bazary mańyndaǵy joldy tez arada keńeitý qajet. Sondai-aq radialdy joldar qurylysyn jyldamdatqan jón. Jańa jol qubyrlary men injenerlik jelilerdi salý kelisip atqarylady.
Almatyny azyq- túlikpen qamtamasyz etý – úilesimdi is-qimyldy qajet etetin mańyzdy máseleniń biri. Almaty – elimizdiń iri tutyný naryǵy. Sońǵy 5 jyl ishinde qala turǵyndarynyń sany 20% ósip, 1,8 mln adamnan asty. Áleýmettik mańyzy bar azyq-túlikterdi - kókónisti, et pen sút ónimderin, jemis-jidekti, túrli jarmalardy tutynýdyń jyl saiynǵy kólemi – 1,1 mln tonna.
Almaty oblysy qalaǵa aýylsharýashylyq ónimderin basty jetkizýshi bola alady. Alaida, qazir tutyný kóleminiń jartysynan azy ǵana jetkizilýde.
Aýylsharýashylyq ónimderin tasymaldaý men jetkizý júiesin aradaǵy deldalsyz durys jolǵa qoiý turǵyndarǵa qoljetimdi ónimder satyp alýǵa múmkindik beredi.
Almaty ákimi eńbekpen qamtý jáne jumys oryndaryn ashý máselesine erekshe nazar aýdardy. Ol úshin shet aimaqtar men qalaǵa jaqyn ornalasqan eldi mekenderde turǵyndar qajettiligi men eńbek naryǵyn eskere otyryp, shaǵyn jáne orta biznesti damytý qajet.
Jańa jumys oryndaryn ashýdyń draiveri týristik áleýetti damytý bolyp tabylady. Mamandardyń málimeti boiynsha, Almatyǵa kelgen sheteldik týristerdiń 80% oblystyń týrobektilerinde bolýdy qalaidy.
Qoljetimdilik pen jaily jaǵdaidy qalyptastyrý úshin kólik jáne joljiegi infraqurylymdaryn damytý qajet. Almatydan yńǵaily avtobýstarmen shyǵatyn týristerdiń Almaty oblysynda ornalasqan ulttyq parkterge saparyn uiymdastyrǵan jón.
«Búgingi áńgimeniń Almaty men Almaty oblysynyń shekaralas aimaqtarynda jańa igilikti isterdiń paida bolýyna yqpal etetinine senimdimin. Bul, bizdiń birigip atqaratyn aýqymdy jumystarymyzdyń bastaýy bolady», - dep atap ótti B. Saǵyntaev.
